आज 'इदउल फित्र’ सार्वजनिक बिदा

भिडियो हेर्नको माथि को बक्स मा डबल क्लिक गर्नु होस्

काठमाडौं, श्रावण २५ - रकारले इस्लाम धर्मावलम्बीको महान् पर्व 'इदउल फित्र' का अवसरमा शुक्रबार सार्वजनिक बिदा दिएको छ । यो पर्वमा हरेक वर्ष सार्वजनिक बिदा दिइँदै आएको छ । हिजरी संवत्को 'रमजानल मुबारक' महिनाभर रोजा (व्रत) बसिसकेपछि मुसलमानले हर्षोल्लासपूर्वक 'इदउल फित्र' मनाउने गर्छन् । हिजरी संवत्को आठौं 'साबान' महिनाको अन्तिम तारिखमा आकाशमा चन्द्रमा उदाएपछि रोजा सुरु हुन्छ । 'इदउल फित्र'का दिन बिहान नुहाइधुवाई गरी सेवई, खजुर, फलफूललगायत मीठा परिकार खाने प्रचलन छ । सफा, राम्रा कपडा र अत्तर (सुगन्ध) लगाएर इदगाह -इदको नमाज पढ्नका लागि बनाइएको विशेष ठाउँ) वा मस्जिदमा गएर इदको नमाज (प्रार्थना) पढिन्छ । नमाज पढिसकेपछि एक-अर्कासँग गला मिलाएर इदको शुभकामना आदान-प्रदान गर्दै भाइचारा र आत्मीयता साटासाट गरिन्छ । इदमा आफन्त र छिमेकीहरूलाई बोलाएर सेवई, खजुरलगायतका मिठा खानेकुरा खुवाउने चलन छ । इदको नमाज पढ्नुअघि एक महिनासम्मको रोजामा भएका कमी-कमजोरी निर्मूल गर्न तथा इदको खुसियालीबाट गरिबलाई समेत वञ्चित रहन नदिन 'शदकतुल फित्र' घरका प्रत्येक सदस्यबाट निकालिन्छ । पौने दुई किलो गहुँ वा साढे तीन किलो जौ, चना, खजुर, दाल तथा त्यसको मूल्यबराबरको रकम परिवारका प्रत्येक सदस्यका तर्फबाट गरिबका लागि निकाल्नुपर्छ । हामीकहाँ भने ती वस्तुको मूल्यांकन गरी रकम नै निकाल्ने गरिएको छ । हाजी नबिबक्स मियाँका अनुसार यो पटक एक जना व्यक्तिबाट ७५ रुपैयाँका दरले 'शदकतुल फित्र' निकालिने तय भएको छ । यसरी सम्पत्ति चुक्ता गर्नाले उसँग बाँकी भएको सम्पत्ति शुद्ध हुने विश्वास छ । उक्त रकम गरिब, मिस्किन, दुःखी, फकिर र असहायहरूलाई बाँडिन्छ । २०६८ को जनगणनाअनुसार मुलुकमा इस्लाम धर्म मान्ने मुसलमानहरू ११ लाख ६४ हजार २ सय ५५ छन् । केही वर्ष अघिदेखि इदका अवसरमा सरकारले सार्वजनिक बिदा दिने गरेको छ । इदका अवसरमा विभिन्न राजनीतिक दल संघ-संस्थाले विज्ञप्तिमार्फत शुभकामना दिँदै इदउल फित्रको बरकतले मुलुकमा सुख-शान्ति, स्थायित्व र समृद्धिको वातावरण बनोस् भन्ने कामना गरेका छन् । शरतसंह भण्डारी नेतृत्वको राष्ट्रिय मधेस समाजवादी पार्टी -रामसपा), राजेन्द्र महतो नेतृत्वको सद्भावना पार्टी, मधेसी जनअधिकार फोरम नेपाल, मधेसी जनअधिकार फोरम लोकतान्त्रिक, तमलोपा नेपाललगायतले शुभकामना दिएका छन् । यस्तै इदका अवसरमा गोरखा मुस्लिम युवा समाज, गोरखा-काठमाडौं मुस्लिम समाजलगायतले पनि शुभकामना दिएका छन् ।