दुर्व्यवहारको विरोधमा ३९ चिकित्सकद्वारा राजीनामा अञ्चल अस्पतालमा बहिरंग सेवा ठप्प

भिडियो हेर्नको माथि को बक्स मा डबल क्लिक गर्नु होस्

विराटनगर‍, भाद्र ९ - बहिरंग विभागमा विरामी जाँच्दै गरेका चिकित्सक योगेन्द्र मिश्रालाई कठालोमा समातेर बाहिर निकाली दुर्व्यवहार गर्ने समूहमाथि प्रशासनले कारवाही नगरेको भन्दै आइतबारदेखि कोशी अञ्चल अस्पतालका चिकित्सकहरु आन्दोलनमा उत्रिएका छन् । चिकित्सकको सुरक्षा हुनु पर्ने माग राख्दै उनीहरुले ३९ जनाको सामूहिक राजीनामा स्वास्थ्य मन्त्रालयमा पठाएका छन् । राजीनामा पत्रमा उनीहरुले 'अभद्र र अमानविय व्यवहार र घटना हुने गरेकाले असुरक्षित महसुस गरेको र काम गर्ने वातावरण नभएकाले सामूहिक राजीनामा दिने निर्णय गरिएको' उल्लेख छ । घटनालगतै क्षेत्रीय प्रशासक शंकर अधिकारीले कोशी अञ्चल अस्पतालमै गएर चिकित्सकहरुलाई 'सुरक्षाको पूर्ण ग्यारेन्टी गर्छु' भन्दै काममा फर्कन आग्रह गरेका थिए । तर, चिकित्सकहरुले दोषीलाई पक्राउ नगरिएसम्म काममा नफर्कने बरु राजीनामा दिने बताएका थिए । मेडिकल सुपरिटेन्डेन्ट उमाकान्त झाले अस्पताल सुचारु गराउन आफुले हर सम्भव प्रयास गरिरहेको बताए । बिहीबार सिरहाको लक्ष्मीपुरकी २७ वर्षीया काजमा प्रवीनको अप्रेशन गरि पेटबाट बच्चा झिकिएको थियो । तर शुक्रबार विहान २ बजे उनलाई छातीमा एक्कासी पीडा भएपछि केही समयमै उनको मृत्यु भएको थियो । अप्रेशन गरि आमा बच्चा दुवैलाई सकुशल पोष्ट-अपमा सारे पनि प्रवीनको मृत्यु भएपछि अस्पतालका प्रसूति विभाग प्रमुख डा.योगेन्द्र मिश्रमाथि मृतकका आफन्तहरुले हातपात गरेका थिए । उनको मृत्यु मुटुमा 'एयर बबल' छिरेकोले भएको हुन सक्ने अस्पतालले जनाएको छ । तर आफन्तले लापरवाहीले भएको भन्दै दुई नाबालक छोराहरूको लालनपालनका लागि २० लाख रुपैयाँ क्षतिपूर्ति मागेपछि प्रमुख जिल्ला अधिकारी गणेशराज कार्कीको कार्यकक्षमा भएको वार्ता विफल भएको थियो । मृतकका पति मोहमद साविर खान प्रहरी हवलदार हुन् । उनी हाल जिल्ला प्रहरी कार्यालय मोरङका प्रहरी उपरीक्षक विश्वराज पोखरेलका सवारी चालकको ड्युटीमा छन् ।