कोरियन भाषाका आवेदक ४७ हजार ९ सय पुगे

भिडियो हेर्नको माथि को बक्स मा डबल क्लिक गर्नु होस्

८ भदौ, काठमाडौं । रोजगारीका लागि आकर्षक गन्तव्य मानिएको दक्षिण कोरियाप्रति नेपाली युवाहरुको आकर्षण केही घटेको छ । भाषा परीक्षा उत्तीर्ण गरेर पनि २ वर्षसम्म कोरिया जान नपाएको भन्दै युवाहरुले आन्दोलन गरिरहेकै बेला खुलेको भाषा परीक्षाको नयाँ आवेदनको मिति शनिबार समाप्त भएको छ । शनिबार अन्तिम दिन ३ हजार ५ सय ६० जनाले आवेदन दिएको ईपीएस कोरिया शाखाले जनाएको छ । यससँगै योपटक भाषा परीक्षाका लागि आवेदन दिनेहरुको कुल संख्या ४७ हजार ९ सय २६ पुगेको छ । जुन २०११ को भन्दा यो झण्डै १० हजार कम हो । शाखाले योपटक झण्डै ७० हजारले आवेदन दिने अनुमान गरेको थियो । तर, यसपालि अनुमान गरिएजति आकर्षण देखिएन । शाखाका अनुसार योपटक सबैभन्दा बढी वनस्थली केन्द्रबाट १२ हजार ३ सय ७८ ले आवेदन दिएका छन् । यस्तै कीर्तिपुरबाट १० हजार १ सय ६३, सानो गौचरनबाट १० हजार ३ सय ६३, बुटबलबाट ८ हजार ४ सय ३७ र धरानबाट ६ हजार ३ सय १२ ले आवेदन दिएका छन् । सन् २०११ मा भाषा परीक्षा पास गरेका करिब ५ हजार ३ सय जना युवायुवतीहरु कोरिया जाने पालो कुरेर दुईवर्षदेखि बसिरहेका छन् । सन् २०१३ मा कोरियाले ईपीएस प्रणाली लागू गरिएका १५ देशबाट ६२ हजार कामदारलाई आफ्नो मुलुकमा भित्र्याउँदैछ ।