सिंह भुकेपछि चिडियाखाना नांगियो

भिडियो हेर्नको माथि को बक्स मा डबल क्लिक गर्नु होस्

सिंह त जमिनै थर्किने गरि गर्जिनुपर्ने हो । तर चिडियाखानामा राखिएको एउटा सिंह भने भुक भुक गरेर भुक्न थाल्यो । सिंह भुक्न थालेपछि चिडियाखाना घुम्न गएका दर्शक तिनछक परे । तर चिडियाखानाका कर्मचारी भने लाजले रातो भए । एउटा ठूलो झुटको पर्दाफास भएकोमा उनीहरु लाजले मर्नु भए ।

यो घटना चीनको हो । चीनको हेनान प्रान्तस्थित एक चिडियाखानामा अफि्रकी सिंह भनेर राखिएको जनावर एकाएक भुकेपछि चिडियाखानाको करतूतको पोल खुलेको हो । वास्तवमा चिडियाखानाले सिंह भनेर कुकुरलाई त्यहाँ राखेको थियो । सिंह भन्दै ढाँटेर चिडियाखानाले तिब्बली जातको कुकुर खोरमा राखेको थियो । त्यो कुकुरको अगाडि पट्टकिा रौँ निकै लामा हुने र कद पनि अग्लो हुने भएकाले ठ्याक्कै सिंहजस्तै देखिन्थ्यो ।

तर आखिर स्याद कहिल्यैपनि सिंह हुन सक्दैन भनेझैँ भुत्ला ठूला हुँदैमा कुकुर सिंह बन्ने कुरै भएन । कुकुरको काम त गर्जिने होइन, भुक्ने हो । त्यसैले सिंह बनाइएको त्यो कुकुर आफुलाई हेर्न आएका मान्छेलाई देखोर भुक भुक गर्दै भुक्यो । सिंह भुकेपछि बल्ल चिडियाखानाको बदमासीको पोल खुल्यो ।

त्यो चिडियाखानाको बदमासी त्यत्तिमात्र कहाँ रहेछ र ? त्यसले दुइ वटा मुसालाई समेत सर्प भनेर देखाउने गरेको रहेछ । फ्याउरोलाई चितुवा भनेर र कुकुरलाई जंगली भेँडा भनेर देखाउने गरेको रहेछ ।

बदमासीको पोल खुलेपछि चिडियाखाना प्रमुखले आफ्नो बचाउ गर्दै चिडियाखानामा पालेको सिंह प्रजननका लागि बाहिर लगिएकोले एक जना कर्मचारीको घरमा पालिएको कुकुर ल्याएर प्रदर्शनमा राखिएको बताएका छन् ।