पाँच सय लिन ३ घन्टा पैदल

भिडियो हेर्नको माथि को बक्स मा डबल क्लिक गर्नु होस्

संखुवासभा, श्रावण २१ - खाँदबारी १२ की ८२ वर्षीया सावित्रा विकलाई सरकारले वितरण गरेको वृद्धभत्ता लिन बैकसम्म पुग्न ३ घन्टा पैदल हिंड्नुपर्छ । केही महिनासम्म उनलाई खाँदबारी नगरपालिकाले घरमै पुगेर भत्ता दिंदै आएको थियो । बुढेसकाल र कमजोर शरीरका कारण उनलाई बैंक पुग्न मात्रै ३ घन्टा लाग्ने गरेको बताइन् । उनले राष्ट्रिय वाणिज्य बैंकको खाँदबारी शाखाबाट मासिक भत्ताबापत ५ सय रुपैयाँ पाउँछिन् । 'महिनाको ५ सय लिन ३ घन्टा हिंड्नुपर्छ, वर्षात्का बेला भएकाले कतिखेर आकाशबाट पानी पर्छ थाहा हाँदैन,' उनले भनिन्, 'साह्रै झन्झट भयो, पहिले-पहिले घरमै पाइन्थ्यो ।' बैंकमा पुगेर पनि उनले सहजै भत्ता पाउँदिनन् । उनलाई कम्तीमा २ घन्टा बैंकमा लाममा बस्नुपर्छ । भत्ता लिएर र्फकंदा उनी ३ दिनसम्म थलासमेत परेको बताउँछिन् । सावित्रा मात्रै होइन, उनका छिमेकी ७२ वर्षीय हर्कबहादुर विकको पनि उस्तै बेथा छ । उनले वृद्ध, विधवा, एकल महिला, अपांगहरूलाई सरकारले दिने सामाजिक सुरक्षा भत्ता बैंकबाट लिन गाह्रो भएको बताए । बैंकबाट सामाजिक सुरक्षा भत्ता लिन असजिलो भएकाले गाउँगाउँबाट नै बाँडिनुपर्ने उनले माग राखे । उनले भने, 'गाउँमै सरकारी कर्मचारी आएर भत्ता बाँडे तातो घाममा हिंडिरहनुपर्ने थिएन । अधिकांश अपांग तथा वृद्ध, विधवा बैंकसम्म धाएर भत्ता लिन सक्ने अवस्थाका छैनन् ।' गाउँमा पुगेर भन्दा बैंकबाट बाँड्दा प्रभावकारी हुने भन्दै जिल्ला विकास समिति र खाँदबारी नगरपालिकाले भत्ता बैंकबाट बाँडेपछि दुःख भोग्नुपरेको गुनासोसमेत उनीहरूको छ । कतिपयले वृद्ध विधवा हिंड्न सक्ने अवस्था नभएकाले नाति/नातिनीलाई साथ लिएर भत्ता लिन सदरमुकाम आउनुपरेकाले थप पीडामा छन् । खाँदबारी ४ पाङ्माका ६५ वर्षीय केशव राई पनि सामाजिक सुरक्षा भत्ता लिन आफूहरूलाई समस्या परेको बताउँछन् । उनले वडावडामा नै भत्ता बाँडिनुपर्ने माग गरे । उनले आफ्नो भत्ता आफन्तलाई दिनुपर्ने समेत माग गरेका छन् । आफ्नी श्रीमती बिरामी भएको कारण बैंकसम्म आउन नसक्ने भएकाले भत्ता पाउनबाट वञ्चित भएको उनको भनाइ थियो । सरकारले स्थानीय निकायबाट भत्ता वितरण गर्दा आर्थिक हिनामिना भएको भन्दै राष्ट्रिय वाणिज्य बैंकबाट रकम वितरण गर्दै आएको जिविसका लेखा परीक्षक दावा भोटेले बताए । 'सरकारको निर्णयका कारण गाउँगाउँ गएर भत्ता वितरण गर्न सकिँदैन,' भोटेले भने, 'उनीहरूलाई परिचयपत्र वितरण गरिसकेकाले गाउँगाउँ गएर भत्ता वितरण गर्न सकिँदैन ।'