भाइचुङको क्लबलाई हराउँदै मनाङ फाइनलमा

भिडियो हेर्नको माथि को बक्स मा डबल क्लिक गर्नु होस्

२४ साउन, काठमाडौं । भारतको सिक्किम युनाइटेडलाई पराजित गर्दै मनाङ मर्स्याङ्दी क्लब भुटानमा जारी किङ्स कप फुटबलको फाइनलमा प्रवेश गरेको छ । बिहीबार भएको पहिलो सेमिफाइनलमा मनाङले भारतीय पूर्व कप्तान भाइचुङ भुटियाको क्लबलाई ६-२ गोल अन्तरले पराजित गरेको हो । खेलमा मनाङले २० सेकेन्डमा नै भीम दर्लामीको गोलबाट सुरुवाति अग्रता लिएको थियो । पहिलो हापको ४३ औं मिनेटमा सिक्किमले पेनाल्टी चुकाउँदा बराबरी गोल गर्ने मौका गुमायो । ५१ औं मिनेटमा सुजल श्रेष्ठले गोल गरेपछि मनाङ २-० को अग्रता लिन सफल भयो । तर, ६२ औं मिनेटमा विजेन्द्रले सिक्किमका लागि गोल गरे । त्यसपछि मनाङलाई केही दबावमा राखेको सिक्किमले ८३ औं मिनेटमा बराबरी गोल गर्ने मौका चुकायो । निर्धारित ९० मिनेटको खेलको अन्त्यतिर सिक्किमले गोल गरेपछि खेल अतिरिक्त समयमा धकेलियो । तर, थपिएको ३० मिनेट पूर्ण रुपमा मनाङको पक्षमा रहृयो । १ सय औं मिनेटमा योना इलियासले गोल गरे भने १ सय ७ औं मिनेटमा शुलभ मास्केले गोल गरेपछि मनाङ ४-२ ले अघि रहृयो । १ सय १० औं मिनेटमा व्यक्तिगत दोस्रो गोल गरेका योनाले १ सय १९ औं मिनेटमा हृयाट्रिक गरेपछि मनाङ ६-२ को फराकिलो जितका साथ उपाधि नजिक पुगेको छ । यसअघि २००४ मा किङ्स कप फुटबलको फाइनलमा मनाङ थाइल्याण्डको बीईसीसँग पराजित भएको थियो ।