भिडियो हेर्नको माथि को बक्स मा डबल क्लिक गर्नु होस्
काठमाडौ, श्रावण २५ - सरकारले पशुपतिनाथ मन्दिरमा भेटी व्यवस्थापन थालेको दुई वर्षमा १० करोड ६९ लाख १८ हजार रुपैयाँ संकलन गरेको छ । पशुपतिनाथ मन्दिरमा दैनिक जम्मा हुने भेटी पारदर्शी बनाउन सरकारले 'मन्दिर तथा पूजा व्यवस्थापन नियमावली २०६८' लागू गरेपछि दस वर्ष बराबरको भेटी दुई वर्षमै संकलन भएको हो । दुई वर्षअघि सरकारले नियमावली लागू गरेको थियो ।
पशुपति क्षेत्र विकास कोषका निर्देशक रमेश उपे्रतीका अनुसार आर्थिक वर्ष ०६८/६९ मा २ करोड ८० लाख ३९ हजार, आव ०६९/७० मा ७ करोड ८८ लाख ७९ हजार गरी यस वर्षको असार मसान्तसम्ममा १० करोड ६९ लाख १८ हजार रुपैयाँभन्दा बढी भेटीघाटी संकलन भएको छ । पशुपति विकास कोषले दिएको जानकारीअनुसार पशुपतिको विशेष पूजाबाट मात्रै ४ करोड २८ लाख रुपैयाँ भेटी संकलन भएको छ । नियमावली लागू हुनुभन्दा अघि मूल भट्टले आपmनो स्वविवेकले मात्र पशुपति मन्दिर व्यवस्थापनका लागि खर्च उपलब्ध गराउने चलन थियो । हनुमान, बूढानीलकण्ठ पूजाबाट २ करोड २८ लाख रुपैयाँभन्दा बढी भेटी संकलन भएको छ ।
त्यसैगरी, हुन्डीबाट २८ लाख ३३ हजार, वासुकीनाथबाट १९ लाख ३३ हजार रुपैयाँभन्दा बढी र पशुपतिनाथ मन्दिरको पूजाबाट ५ करोड ४६ लाख रुपैयाँभन्दा बढी संकलन भएको छ । 'यसअघि खासै हिसाबकिताब नै थिएन, मूलभट्टले स्वविवेकले जति दिए पनि हुन्थ्यो, अब पारदर्शी भयो,' उनले भने । विशेष पूजाको दस प्रतिशत रकम भट्ट-पुजारीका लागि छुट्याउने तयारी पशुपति व्यवस्थापन समितिले गरेको छ । विशेष पूजा गरेबापत भट्टलाई केही रकम छुट्याउने परम्परा अनुसार नै दस प्रतिशत छुट्याउन लागिएको
हो । यद्यपि त्यसको व्यवस्था बोर्डले निर्णय गरेपछि मात्र कार्यान्वयनमा आउनेछ ।
सरकारले मन्दिर तथा पूजा व्यवस्थापन नियमावली लागू गरेपछि यस्तो हिसाब बाहिर आएको हो । यसरी उठेको रकमबाट विशेष पूजा, भट्टको पारिश्रमिक तथा सुविधा, भण्डारी पारिश्रमिक तथा सुविधामा खर्च गर्नुपर्ने नियमावलीमा प्रावधान छ । त्यसैगरी नित्य पूजा, पर्व पूजा, कर्मचारी खर्च र अन्य पूजामा खर्च गरी करिब ६ करोड रुपैयाँभन्दा बढी खर्च भएको छ भने, ४ करोड रुपैयाँ बचत भएको छ ।
परम्परागत रूपमा पशुपति मन्दिर हेरचाहका लागि खटिएका निश्चित कर्मचारीलाई भेटीघाटीबाट उठेको रकमबाट तलब भत्ता दिइने व्यवस्था छ । विकास कोषका १ सय ९६ कर्मचारीलाई भने पशुपतिको आन्तरिक खर्चबाट तलब भत्ता व्यहोर्ने गरिन्छ । पर्यटक शुल्क, पार्किङलगायतका विभिन्न शुल्क गरी कोषले वाषिर्क २८ करोड रुपैयाँभन्दा बढी आम्दानी गर्छ ।
निर्देशक उप्रेतीले भनेजति दर्शनार्थीलाई अझै सेवा सुविधा दिन नसकेको भन्दै आगामी दिनमा त्यसलाई व्यवस्थित गर्दै लैजाने बताए । 'कमी-कमजोरी छन्, सुधार गर्दै जान्छौं, नयाँ प्रयोग हो, सिक्दै छौं,' उनले भने । पशुपतिनाथ मन्दिर प्रवेश सजिलै गराउन सके भेटी बढी संकलन गर्न सकिने उनले बताए । 'अझै पनि कतिले हुन्डीमा पैसा खसाल्दैनन्, बानी नै परेको छैन,' उनले भने ।
पशुपति मन्दिरमा प्रत्येक दिन तीस वटाभन्दा बढी विशेष पूजा लाग्छन् । पूजामा एकजना दर्शनार्थीले बीस हजार रुपैयाँभन्दा बढी भेटी चढाउँछन् । विगतका वर्षमा वर्षदिनको मन्दिरको भेटीघाटी दुई लाख रुपैयाँ मात्र सार्वजनिक गरिएको थियो । पुरानो परम्पराअनुसार पुजारी र भण्डारीले भेटीघाटी लाने गरेका थिए ।
Post a Comment
http://filmysangalo.blogspot.com/ कुनै मान्यता प्राप्त पत्रकार बाटसंचालित होईन | यो ब्लग बाट प्रकासित हुने सामाग्रीहरु नेपालको मान्यता प्राप्त पत्रपत्रिकाहरु र Youtube बाट प्रतिलिपि गरी Facebook मार्फत श्रोता सामुपुर्याउने सानो जमर्को मात्र गरेका हौ |
Note: Only a member of this blog may post a comment.