जेलका सुरक्षाकर्मीको पनि गोप्य निगरानी

भिडियो हेर्नको माथि को बक्स मा डबल क्लिक गर्नु होस्

२६ असार, काठमाण्डौं । कारगारको सुरक्षार्थ खटिएका प्रहरीहरूको गतिविधिविरुद्ध उजुरी पर्न थालेपछि प्रहरी प्रधान कार्यालयले देशभरका कारगार (जेल) को सुरक्षार्थ खटिएका सुरक्षाकर्मीमाथि नै निगरानी सुरु गरेको छ । कारागारमा रहेका सुरक्षाकर्मीमाथि जिल्ला तथा अञ्चल प्रहरी कार्यालयले निगरानी गर्न थालेका हुन् । कारागरबाटै हुन सक्ने आपराधिक क्रियाकलापलाई ध्यानमा राखेर उनीहरूको अनुगमन तथा निगरानी बढाइएको हो ।

केन्द्रीय कारगार नक्खु, पर्सास्थित वीरगन्ज कारागारबाट लागूऔषधको कारोबार हुने गरेको भन्दै कारागारकै कैदी बन्दीले प्रहरी प्रधान कार्यालय कारागार व्यवस्थापन विभागका साथै विभिन्न निकायमा उजुरी गरेपछि अहिले सो कारागारको सुरक्षाका लागि खटिएका प्रहरी कर्मचारीहरूको निगरानी सुरु भएको स्रोतले बतायो । सुनसरीको झुम्का कारागारबाट १७ जना कैदीले सुरुङ खनेर फरार भएपछि त्यहा सुरक्षार्थ खटिएका प्रहरी नायब निरीक्षक जितबहादुर केसीको कमजोरी मात्र होइन, बन्दीसँग घनिष्ठ सम्बन्धले सो घटना भएको निष्कर्ष आएको थियो ।

त्यसअघि सुरक्षार्थ खटिएका प्रहरीले नै कैदी/बन्दीहरूलाई उपचार गराउने बहानामा रेस्टुरेन्ट पुर्याउने लगायतका गैरकानुनी कार्यमा संलग्न हुँदै आएपछि प्रधान कार्यालयले मातहत निकायलाई अनुगमन गर्न निर्देशन दिएको थियो । कैदी/बन्दी सुरक्षाकर्मीको मिलेमतोमा आपराधिक काम गर्ने भएकाले नै सुरक्षाकर्मीको गतिविधिबारे निगरानी गर्नुपरेको प्रहरी प्रवक्ता प्रहरी नायब महानिरीक्षक (डीआईजी) नवराज सिलवालले जानकारी दिएको खबर राजधानीदैनिकले छापेको छ ।

‘कारागारमा अपराधीहरूसँग नै सुरक्षाकर्मी मिलेर गैरकानुनी काम गर्छन् भन्ने गुनासो मात्र आएको छैन, यसअघि केही तथ्यहरू नै प्रमाणित भएका छन् त्यसकारण पनि उनीहरूमाथि नै निगरानी गर्नुपरेको हो,’ प्रवक्ता सिलवालले भने । अहिले वीरगन्ज कारागरमा रहेका लालबाबु अन्सारी, नन्दकिशोर यादव, अशेश्वर पटेललगायतले जेलर धीरज मरासैनी, प्रहरी नायब निरीक्षक राजकुमार महतोको आडमा लागूऔषधको तस्करी गरेको उजुरी परेको छ । कैदी/बन्दीहरूले गृह मन्त्रालय, कारागार व्यवस्थापन विभाग, प्रहरी प्रधान कार्यालय तथा मुख्य सचिवको कार्यालयमा समेत लिखित उजुरी गरेका छन् । प्रहरी प्रधान कार्यालयमा उजुरी आएपछि सो कारागारमा खटिएका सुरक्षाकर्मीको गतिविधिबारे निगरानी बढाउनुका साथै त्यहाँस्थित लागूऔषध नियन्त्रण ब्युरोलाई पनि सतर्क बनाइएको छ ।