बेपत्ता नफर्केपछि काजकिरिया तयारी

भिडियो हेर्नको माथि को बक्स मा डबल क्लिक गर्नु होस्

टालेगाउँ (जाजरकोट), असार २५ - मुलेडाँडागाउँका दलबहादुर सिंह बेपत्ता भाइ अभिको खोजी गर्दै गत साता भारतको उत्तराञ्चल राज्यको गौरीकुण्ड पुगे । टालेगाउँ ४, मुलेडाँडाका उनी बेपत्ता भाइलाई फेला पार्न नसकी १० दिनपछि घर फर्केका छन् । छोरा र्फकने आस हराउँदै गएपछि बाबु नैनबहादुर काजकिरियाको तयारी गर्दै छन् । गौरीकुण्डस्थित केदारनाथधाम नजिक असार पहिलो साता आएको बाढीमा अभिसहित ३ जना ३ साता बितिसक्दा पनि सम्पर्कमा नआएपछि आफन्त काजकिरिया तयारीमा लागेका हुन् । उक्त विपद्बाट मुलेडाँडाका ३१ वर्षीय अभिबहादुर, २० वर्षीय गणेशबहादुर र २२ वर्षीय धीरेन्द्रबहादुर सिंह बेपत्ता छन् । घटनाका बेला सँगै रहेका साथी जनकबहादुर सिंह घर फर्के पनि आफ्नो छोरा नभेटिँदा परिवार चिन्तामा डुबेको हो । 'न सास, न लास भयो,' बुवा नैनबहादुरले भने, 'अब त आशा मार्ने बेला भइसक्यो ।' डोली बोकेर कमाइ गर्न एकैसाथ त्यहाँ गएका जनकबहादुर, बखतबहादुर, वीरेन्द्रबहादुर सिंह र हरिबहादुर शाही घर फर्केपछि बेपत्ताको खोजी गर्न आफन्त गौरीकुण्ड पुगेका हुन् । बेपत्ता अभि, गणेश र धीरेन्द्रको खोजी गर्न दाजुहरू दल, पूर्ण र काका धन उता गएका थिए । 'खोजीका लागि घटनास्थल जान पाएनौं, भारतीय अधिकारीले कम्प्युटरमा तस्बिर देखाए । तर त्यसमा हाम्रा बेपत्ताको तस्बिर थिएन । देखिएका अधिकांश तस्बिर आधा थिए,' दलबहादुरले भने । बेपत्ताको खोजी गर्ने क्रममा ७० हजार रकम खर्च भइसकेको आफन्तले बताए । उनीहरू फर्केर आउने कुनै आशा नहुँदा मंगलबारसम्म बाटो हेर्ने आफन्त धनबहादुरले बताए । 'दुर्घटनाअघि असार १ गते फोन सम्पर्क हुँदा सबै ठीकै छ, हामी ६ भाइ एकै ठाउँमा छौं, साउनमा घर र्फकन्छौं,' भन्थ्यो अभिले । यो वर्ष गाउँबाट एसएलसी कति उत्तीर्ण भए भनेर सोधेको थियो । त्यसपछि सम्पर्क नभएको ३ साता बित्यो, ऊसहित सबै फर्किएलान् भन्ने आश थियो,' बाबु नैनले भने । केदारनाथनजिकैको रामबाडा बजारमा ६ जना सँगै बसेका थियौं । एक्कासि पहिरो आएपछि ३ जना भागे । उनीहरू कता गए पत्तो नभएको घर फर्केका बखतले बताए । अधिकांश भाग्ने क्रममा चिसोले मृत्यु भएको थियो । 'उच्च हिमाली भेक हुँदै भाग्ने क्रममा अभि बेहोस भए, अनि त्यही ओडारमा कम्मल ओडाएर छोडेँ, अनि आफू हिमाल क्रस गरेर सुरक्षित भएँ । उसको स्थिति अज्ञात छ,' घर फर्केका जनकले भने । उनी सँगै तीर्थालुको डोली बोक्थे । राम्रो कमाइ हुने हुँदा विगत ३ वर्षदेखि त्यता जाने गरेको उनले बताए । पढाइ तथा घर खर्च जुटाउन छोरा जाने गरेको अभिकी आमा पानसराले बताइन् । अभि स्नातक पढ्दै थिए । उनले शिक्षक सेवा आयोगको प्राथमिक शिक्षक परीक्षासमेत दिएका छन् । त्यसैगरी धीरेन्द्र र गणेश कक्षा १२ मा पढ्थे । अभिका नाबालक २ छोरा र १ छोरी छन् । पति बेपत्ता भएपछि यी नाबालक छोराछोरीलाई के कसरी हुर्काउने चिन्ताले सताएको पत्नी धर्मशीलाले बताइन् ।