रोजगारीकालागि हिँडेका दुई जना बेपत्ता

भिडियो हेर्नको माथि को बक्स मा डबल क्लिक गर्नु होस्

नयाँ दिल्ली, श्रावण २ - बाँके जिल्लाबाट रोजगारीकालागि गुजरातको सुरत हिंडेका दुई चिनारु दुई सातादेखि बेपत्ता रहेको भन्दै एक जिल्लाबासी दिल्लीस्थित दुतावासमा खोजबिनको आग्रह गर्न आइपुगेका छन् । बाँकेस्थित बागेश्वरी गाविसका पूर्व अध्यक्ष खड्गबहादुर कामीका अनुसार आफ्नै गाउँका ६२ वर्षीय वीरबहादुर कुमाल र १७ वर्षीय कमल रैदास कामको खोजीमा असार १५ मा निजामुद्धिन रेल्वे स्टेशनबाट छुटेका हुन् । कामीका छोरा फत्तेसिंहले सुरतमा खोलेको चाइनिज खानेकुरा बेच्ने ठेलागाडीमा काम गर्न हिँडेका यी दुई जनता एक्सप्रेसमा चढेको तर, अझै सम्पर्कहीन रहेको विवरण टिपाएका छन् । ‘म यी दुईलाई खोज्दै यहाँका रेल्वे स्टेशनहरुमा पुगिसकें, तर कतै भेटेको छैन,’खड्गबहादुरले भने,‘अब सुरत हुँदै मुम्बइसम्म पुग्नेछु, दुतावासले पनि खोजबिनकालागि सहयोग गरिदेला कि भनेर यहाँ आएको हुँ ।’ खड्गबहादुर सम्पर्कहीन वीरबहादुर र कमलको तस्बिर साथैमा राखेर खोजबीनमा निस्केका छन् ।