तिब्बती शरणार्थीको निगरानी गर्न सादा पोसाकका प्रहरी, धार्मिक क्षेत्रमा बढि निगरानी

भिडियो हेर्नको माथि को बक्स मा डबल क्लिक गर्नु होस्

२५ असार, काठमाण्डौं । तिब्बती शरणार्थी रहेका मुलुकभरका १८ ओटै क्याम्पमा प्रहरीले उच्च सुरक्षा सर्तकतासहित सूचना संकलनका लागि सादा पोसाकका प्रहरी परिचालन गरेको छ । भारतको बोधगयामा भएको शृंखलाबद्ध आतंककारी आक्रमणपछि नेपालमा रहेका बौद्ध स्तुपा, गुम्बा तथा तिब्बती क्याम्पहरूमा सुरक्षा सतर्कता बढाइएको हो । नेपाल प्रहरीका प्रवक्ता प्रहरी नायब महानिरीक्षक (डीआईजी) नवराज सिलवालका अनुसार नेपालमा रहेका १३ हजार ६ सय ६८ तिब्बती बसेका सबै क्याम्पमा निगरानी बढाइएको छ । तिब्बती शरणार्थीले नेपालमा पनि गतिविधि बढाउने र अप्रिय घटना घटाउन सक्ने भन्दै सुरक्षा सतर्कता बढाई सादा पोसाकका प्रहरी परिचालन गरिएको हो । । ‘विदेशी प्रभाव नेपालमा पर्न सक्छ, आतंककारीहरूले जहाँ पनि हमला गर्न सक्छन्, धार्मिक संस्थाहरूमा तारो बनाउँदै लगेका छन्, त्यसकारण प्रहरीले सबैजसो धार्मिक संस्थाहरूमा निगरानी बढाउँदै लगेको छ,’ डीआईजी सिलवालले भने । धार्मिक सद्भाव कायमै रहनुपर्छ, जुनुसुकै धार्मिक स्थलमा पनि आक्रमण गर्नुहुँदैन भन्ने आममान्यतामा सुरक्षा निकाय सजग रहेको जानकारी पनि प्रहरी प्रवक्ता सिलवालले दिए । प्रहरीले बौद्ध धर्मसँग सम्बन्धित स्थलमा मात्रै होइन, हिन्दूहरूको मन्दिर तथा मुस्लिम समुदायको मस्जिदमा समेत सुरक्षा सतर्कता अपनाएको बताएको छ । बोधगयामा भएको आतंककारी हमलापछि विशेषगरी लुम्बिनी, स्वयम्भूनाथ, पाटनस्थित गोल्डेन स्तुपा, बौद्धको गुम्बामा पनि प्रहरीले विशेष सुरक्षा सतर्कता अपनाएको जनाएको छ । तिब्बतीहरूको क्याम्पमा पनि आक्रमण हुन सक्ने खतरा रहेको भन्दै उनीहरूको गतिविधि निगरानी र सुरक्षा दुवै एकसाथ हुने निष्कर्षसहित प्रहरीले क्याम्पतर्फ सतर्कता बढाएको हो । तिब्बती शरणार्थीहरूले दलाई लामाको जन्मदिनलाई लक्षित गरेर नेपालमा चीनविरोधी गतिविधि गर्ने सम्भावनासमेत बढेको अवस्थामा प्रहरीले उनीहरूको गतिविधिलाई पनि निगरानीमा राखेको थियो । तर, त्यस दिन खासै गतिविधि नभएपछि प्रहरीले पछिल्लो समयमा तिब्बती शरणाथीहरूको गतिविधि कम भएको मूल्यांकनसहित क्याम्पलाई सामान्य निगरानी मात्रै गरेको थियो । भारतको बोधगयामा भएको विस्फोटनपछि मातहत निकायलाई एकै पटक सुरक्षाकर्मी बढाउन निर्देशन दिएको थियो । महानगरीय परिसर काठमाडौंका प्रमुख प्रहरी वरिष्ठ उपरीक्षक (एसएसपी) सुबोध घिमिरेले आइतबार रातिबाटै क्याम्पहरूमा सुरक्षा व्यवस्था कडा पार्न निर्देशन दिइएको बताएको राजधानी दैनिकमा खबर छ । ‘कहिलेकाहीं आतंकारीहरूको असर यता पनि पर्न सक्छ, त्यसकारण हामीले सबै धार्मिक स्थल र तिब्बतीयन क्याम्पमा समेत सुरक्षा सतर्कता बढाएका छौं,’ एसएसपी घिमिरेले भने ।