अन्तर्राष्ट्रिय बजारमा सुनको मूल्यमा कमी

भिडियो हेर्नको माथि को बक्स मा डबल क्लिक गर्नु होस्

काठमाडौ, असार २४ - अन्तर्राष्ट्रिय बजारमा सुनको मूल्यमा कमी आएको भए पनि नेपालमा सुनको मूल्य वृद्धि भएको छ । अमेरिकी डलरको नेपाली विनिमयमा आएको परिवर्तनले सुनको मूल्य बढ्न गएको हो । नेपाल सुनचाँदी व्यवसायी महासङ्घले आज छापावाल सुनको मूल्य प्रतितोला ४९ हजार १०० कायम गरेको छ । आइतबार प्रतितोला रु ४८ हजार ६०० मूल्य कायम भई कारोबार भएकामा आज सोको मूल्यमा प्रतितोला रु ५०० ले वृद्धि आएको महासङ्घले जनाएको छ । त्यसैगरी तेजाबी सुन प्रतितोला आज रु ४८ हजार ८५० कायम भई कारोबार भएको छ । सोको मूल्य आइतबार रु ४८ हजार ३५० मा कारोवार भएको थियो । महासङ्घले असली चाँदीको मूल्यमा पनि आइतबारको तुलनामा आज प्रतितोला रु पाँचले वृद्धि भई रु ८०५ कायम भही कारोबार भएको छ । महासङ्घका अध्यक्ष मणिरत्न शाक्यले अन्तर्राष्ट्रिय बजारमा सुनको मूल्यमा कमी आए पनि नेपाली रुपैयाँको अवमूल्यन भई त्यसको अनुपातमा अमेरिकी डलर महङ्गो भएकाले नेपाली बजारमा सुनको मूल्य वृद्धि भएको बताए । उनले आइतबार प्रतिअमेरिकी डलर बराबर नेपाली रु ९६.७० रहेकामा आज र एक अमेरिकी डलर बराबर नेपाली रु ९८ हुन गएको छ भन्दै अन्तर्राष्ट्रिय बजारमा सुन प्रतिऔँस आइतबारको तुलनामा ५ अमेरिकी डलरले कम भई आज एक हजार २२० अमेरिकी डलर कायम भएको जानकारी दिए । रासस