सिरियाली युद्धमा मानव ढाल बनेका बालबालिका

भिडियो हेर्नको माथि को बक्स मा डबल क्लिक गर्नु होस्

न्युयोर्क (एएफपी), जेष्ठ ३१ - राष्ट्रसंघले सिरियामा करिब २६ महिनादेखि जारी द्वन्द्वमा बालबालिकालाई ढालका रूपमा प्रयोग गरेको पाइएको बताएको छ । संघले युद्धमा सरकारी र विद्रोहीहरूले समेत मानव ढालका रूपमा बालबालिकालाई प्रयोग गरेको बताएको हो । बुधबार सार्वजनिक गरिएको बालबालिकाको अवस्था सम्बन्धी प्रतिवेदनमा हजारौं बालबालिका मारिएका पनि देखाइएको छ । प्रतिवेदन सार्वजनिक गर्दै राष्ट्रसंघका महासचिव बान कि-मूनले यो युद्ध आधुनिक संसारकै एक अत्यन्तै अस्वाभाविक र अस्वीकार्य दुःख भएको टिप्पणी गरेका छन् । हताहत बालबालिकाको संख्या सरकार वा त्यहाँ कार्यरत कसैसँग पनि नरहेको भन्दै युद्ध सुरु भएदेखि बालबालिकाले निकै ठूलो दुःख पाइरहेका उनले बताए । प्रतिवेदनका अनुसार सिरियामा बम विस्फोटका साथै अन्य आतंककारी कामका लागि बालबालिकालाई प्रयोग गर्ने गरेको पाइएको छ । त्यहाँ अहिले पनि सयौं बालबालिका घाइते तथा अपांग रहेकाले पनि यो प्रमाणित हुने प्रतिवेदनमा पाइएको छ । विद्रोही समूहले १५ देखि १७ वर्षसम्मका बालबालिकालाई सेनामा भर्ती गरिरहेेका समाचारहरू आइरहेका पनि प्रतिवेदनमा उल्लेख गरिएको छ । साथै, सरकारी सेनाले पनि बालबालिकालाई यौन दुव्र्यवहार गर्ने गरेका तथा उनीहरूले विद्रोहीका सूचना लिने काममा समेत यस्ता बालबालिका प्रयोग गर्ने गरेको पाइएको छ । त्यहाँ हाल पनि द्वन्द्व जारी छ । हजारौं बालबालिका विस्थापित छन् । करिब तीन हप्ता मात्रअघि अमेरिका र रुसले सिरियासँग शान्ति वार्ताको प्रस्ताव राखेपछि आगामी केही दिनमै जेनेभामा वार्ताका लागि यी दुई देशले अभ्यास गरिरहेका बताइएको छ । वार्ताको प्रस्तावमा राष्ट्रपति बसार अल असादले सहमति जनाइसकेका छन् । जारी हिंसाको अन्त्यका लागि भन्दै आगामी केही दिनमा जेनेभामा वार्ताको तय भएको छ । त्यसका लागि युरोपेली संघ, राष्ट्रसंघ लगायतले सहयोग गर्ने बताएका छन् । सिरियामा सन् २०११ को मार्च महिनादेखि राष्ट्रपति असादको राजीनामा माग गरी आन्दोलन सुरु भएको हो । आन्दोलनका क्रममा अहिलेसम्ममा कम्तीमा पनि ९४ हजार नागरिकको ज्यान गइसकेको छ ।