ओस्कारमा सुनगाभा जाने

भिडियो हेर्नको माथि को बक्स मा डबल क्लिक गर्नु होस्

काठमाडौ, भाद्र ८ - ६ महिनापछि अमेरिकाको लस एन्जल्समा हुने ८६ औं एकेडेमी अवार्ड्स (ओस्कार) को विदेशी भाषी समूहका लागि नेपालतर्फबाट फिल्म 'सुनगाभा' छानिएको छ । ओस्कारका लागि नेपालको छनोट समितिले शुक्रबार सुवर्ण थापा निर्देशित फिल्म सिफारिस गरेको हो । आमी फिल्मस्को ब्यानरमा लेस्वियन अधिकारलाई आत्मसात गरेको फिल्ममा दिया मास्के र निशा अधिकारीको मुख्य भूमिका रहेको छ । विमल पौडेल अध्यक्ष रहेको छनोट समितिले 'सुनगाभा' लाई कथ्यको प्रस्तुति, चरित्रको भावनात्मक विश्लेषण र कलात्मक बुनोटका आधारमा बाँकी प्रतिस्पर्धी फिल्मभन्दा अब्बल ठहर्‍याएको विज्ञप्तिमार्फत जनाएको छ । देशको प्रतिनिधित्वका लागि ओस्कार छनोटमा 'शिरिषको फूल', 'बधशाला' र 'साँघुरो' पनि थिए । तर ओस्कारका लागि छनोट भएलगत्तै 'सुनगाभा' ले देशको प्रतिनिधित्व गर्न नसक्ने भन्दै विवादमा पनि तानिएको छ । फिल्मका निर्देशक, निर्माता तथा लेखक सुवर्ण थापा फ्रान्सेली नागरिक भएकोले नेपाली फिल्ममा समेट्नु गल्ती हुने भन्दै विरोध पनि हुन थालेको छ । 'बधशाला' फिल्मका निर्माता मोहन डोटेलले आइतबार त्यसविरुद्धमा सर्वोच्च अदालतमा मुद्दा दर्ता गर्ने जनाए । भने, 'यो मुद्दा व्यक्ति वा फिल्म लक्षितभन्दा पनि प्रक्रियामा हो । गलत प्रक्रियाबाट फिल्म छानिनु र पठाइने संस्कार रोकियोस् भनेर कदम चाल्न खोजेको हुँ ।' ओस्कारमा छानिएको खुसीलाई विवादको घेराले छोपेपछि निराश देखिएका निर्देशक सुवर्णले आफू सन् २०१२ देखि फ्रान्सको नागरिकता लिएको स्वीकार गर्दै भने, 'कानुनतः म विदेशी नागरिक हुँला । तर यो फिल्ममा अरू सबै नेपाली छन् । र, मैले नेपाली मनले बनाएको हुँ । मैले नेपाली फिल्ममार्फत देशलाई नै विश्वमाझ चिनाउन खोजेको हुँ ।'