१० बर्षपछि भेटिए छोरा

भिडियो हेर्नको माथि को बक्स मा डबल क्लिक गर्नु होस्

मध्य प्रदेशको रिबामा श्रमिक रहेका बाबुलाई भेट गर्न हिंडेका अछाम, बर्दादेवी-७ का भीमबहादुर साउद घरबाट निस्केको १० बर्षपछि मात्रै भेटिएका छन् । कोलकाताबाट १ सय १६ किलोमिटर उत्तरस्थित भारत-बंगालादेशको सिमानामा पर्ने पेट्रापोलमा भेटिएका २४ बर्षीय भीमबहादुरले आफ्ना बाबु नरपतिबहादुरको नाम र आफ्नो गाउँको नाम मात्रै भन्न सकेका थिए । स्थानीय बंगाली पसलेले दिएको जानकारीका आधारमा कोलकातास्थित महाबाणिज्य दूतावासले गत भदौ १ गते भीमबहादुरलाई फेला पारेर जिम्मामा लिएको थियो । पेट्रापोलबाट उद्धार गरेर कोलकाता ल्याएपछि भीमबहादुरलाई स्थानीय नेपाली मुक्ति ढकालले आश्रय दिएका थिए । 'त्यति धेरै र स्पष्टसँग कुरा भन्न नसक्ने अवस्थामा रहेका भीमबहादुरबाट पाएको विवरणका आधारमा अछामस्थित रामारोशन एफएमबाट यो सूचना जारी गरेका थियौं', कोलकातास्थित महाबाणिज्यदूत चन्द्रकुमार घिमिरेले भने-'त्यो एफएमको सूचना सुनेर भीमबहादुरका आफन्त सम्पर्कमा मात्रै आउनुभएन, बीरगंजस्थित जिल्ला प्रशासनको मातहतमा आएर आफ्नो छोरालाई जिम्मा लिइसक्नुभएको छ ।' गत शुक्रबार भीमबहादुर काका बिजय साउदले आफन्तको जिम्मा लिइसकेका छन् । यो प्रकृया पुरा गर्न अछाम र पर्साका जिल्ला प्रशासन कार्यालयले समन्वयकारी भूमिका निभाएका थिए । भीमबहादुरका बाबु अहिले पनि राजस्थानमा मजदुरी गरिरहेका छन् । सानै उमेरदेखि मानसिक रुपमा थोरै बिचलित रहेका भीमबहादुरले अछामको बर्गादेवीस्थित जनज्योती प्राविबाट ८ कक्षा उत्तीर्ण गरेका छन् । उनी गाउँमा सौतेनी आमाको आश्रयमा रहँदै आएका थिए । १० बर्षअघि उनी जयपुरको राजस्थानबाट मध्यप्रदेशको रिबामा बाबु भेट्न बसयात्रामा थिए । त्यसपछि एकाएक बेपत्ता बनेका उनलाई अभिभावकले राजस्थान, मध्यप्रदेश र महाराष्ट्रका थुप्रै रोजगारी गन्तव्यमा खोजी गरेका थिए । तर कहीं फेला नपरेपछि छोराको माया मारेर बसेका थिए । बंगालादेशको सिमावर्ती पेट्रापोलमा भने भीमबहादुर सडकमा सुत्ने गर्थे । उनलाई स्थानीय किराना पसलेले खानपिन दिंदै आएको थियो ।