बन्दलाई अदालतले रोक लगाएपछि दार्जीलिङमा ‘घरभित्रै जनता’ कार्यक्रम अदालतलाई छल्न दार्जीलिङबासीको नयाँ कला प्रदर्शन

भिडियो हेर्नको माथि को बक्स मा डबल क्लिक गर्नु होस्

३२ साउन, काठमाडौं । गोरखाल्याण्ड राज्यको माग गर्दै आन्दोलनरत दार्जीलिङका राजनीतिक दलहरुले आफ्नो शान्तिपूर्ण आन्दोलनलाई वैधानिक पुष्टि गर्न अनेकन कला प्रयोग गर्न थालेका छन् । कहिले सडकमा नांगै लम्पसार परेर अलग राज्य माग्ने उनीहरुलाई यतिबेला उच्च अदालतले बन्द र हडताल नगर्न आदेश दिएपछि अर्को कला प्रदर्शन गनुपर्ने बाध्यता आइलागेको हो । अदालतले हडताल गर्न नदिएपछि आन्दोलनकारीले बन्दकै अर्को रुपमा पाँचदिने ‘घरभित्र जनता’ कार्यक्रम आहृवान गरेका छन् । जनकर्फ्यूलाई कोलकाता उच्च अदालतले असंवैधानिक भनेपछि आन्दोलनको नाम परिर्वतन गरिएको हो । ‘जनता घरभित्रै बस्नेछन् । यो उनीहरुको इच्छा हो । हामी उहाँहरुको इच्छाको सम्मान गछौं’ समितिका प्रवक्ताले त्यहाँको स्थानीय पत्रिका दार्जीलिङ टाइम्ससँग भनेका छन् । उनका अनुसार घरभित्र जनता अभियानका क्रममा पसल तथा बजार खुल्नेछैनन् । अदालतले अनिश्चित कालीन बन्द गर्न नपाइने भनेपछि आन्दोलनकारीले कसैले बन्द नगरेको तर जनता आफ्नै इच्छाले घरभित्रै बसेको नयाँ तर्क अघि सारेका हुन् । पश्चिम बंगाल राज्यअन्तरगत कोलकाता हाइकोर्टका मुख्य न्यायाधीशले अनिश्चितकालीन बन्द कहिल्यै नसुनेको भन्दै दार्जीलिङको आन्दोलनलाई असंवैधानिक भएको घोषणा गरेका थिए । अदालतको रायपछि आन्दोलनरत पार्टीहरुको शुक्रबार बसेको संयुक्त बैठकले ‘गोरखाल्याण्ड संयुक्त कार्यसमिति’ गठन गर्दै हालै आहृवान गरिएको जनकफ्र्यूलाई ‘घरभित्र जनता’ नाम दिँदै भदौ ३ देखि ५ गतेसम्म आहृवान गरेको हो । आज घोषणा गरिएको सबै कार्यक्रम ‘गोरखाल्याण्ड संयुक्त कार्यसमिति’को हो’ गोरखा जनमुक्ति मोर्चाका अध्यक्ष विमल गुरुङले फेसबुकमा लेखेका छन् । जनकर्फ्यूलाई अदालतले असंवैधानिक भनिएकोबारे सोधिएको प्रश्नमा ‘गोरखाल्याण्ड संयुक्त कार्यसमिति’का प्रवक्ताले आफूहरुले जनताको कफ्र्यू नभनेको तर, पश्चिम बंगाल सरकारको रबैयाको जनताले विरोध गरेको बताए । उनका अनुसार ‘राखी पर्व’ परेकाले भदौ ९ र १० गते भने ‘घरभित्र जनता’ आन्दोलन स्थगित गर्ने सहमति भएको छ । ‘गोरखाल्याण्ड संयुक्त कार्यसमिति’ले समस्या समाधानका लागि राज्य सरकारमाथि केन्द्र सरकारले हस्तक्षेप गर्नुपर्ने माग समेत गरेको छ । यद्यपि पश्चिम बंगाल राज्यपाल एम के नारायननले बोलाएको वार्तामा जाने बताइएको छ । आमहड्ताल गर्दा माग सुनुवाइ गर्नुको साटो राज्य सरकारले नेपाली माओवादीले हतियार दिएको आरोप लगाएपछि बुधबार र बिहीबार दुई दिने जनकर्फ्यू आहृवान गरिएको हो । जन कफ्र्यूको अवधिमा सर्वसाधारणहरु घरभित्रै बसेर समर्थन गरेका छन् । दुईसाता देखि दार्जीलिङमा चर्केको अलग राज्य मागसम्बन्धी आन्दोलन अझै मथ्थर भएको छैन । राज्य सरकारले सयौं नेताहरुलाई गिरफ्तार गरिसकेको छ । पहाडको यो आन्दालनेले भारतीय संसदमा समेत विवाद भइरहेको छ ।