प्रमुख विवादमा पाटन क्याम्पस महिनादेखि ठप्प

भिडियो हेर्नको माथि को बक्स मा डबल क्लिक गर्नु होस्

ललितपुर, भाद्र १० - क्याम्पस प्रमुख पदको विषयमा विद्यार्थी संगठनहरूबीच विवादले पाटन संयुक्त क्याम्पस एक महिनादेखि बन्द भएको छ । क्याम्पस प्रमुखले राजीनामा दिने, नदिनेबारे एमाओवादी निकट अखिल क्रान्तिकारी र अन्य विद्यार्थी संगठनबीच विवाद हुँदा सयौं विद्यार्थीको पठनपाठन एक महिनादेखि रोकिएको हो । एमाले अखिल, नेविसंघ, वैद्य माओवादीको क्रान्तिकारी, अखिल छैटौंले क्याम्पस प्रमुख अमन श्रेष्ठको राजीनामा माग्दै क्याम्पस प्रवेशमा रोक लगाएका छन् भने एमाओवादीको अखिल क्रान्तिकारीले प्रमुखको समर्थन गरेको छ । राजीनामा माग्ने विद्यार्थी संगठनले क्याम्पस प्रमुखले आर्थिक अनियमितता गरेको आरोप लगाएका छन् भने क्याम्पस प्रमुखले पुष्टिको चुनौती दिएका छन् । तलब नपाएपछि नेपाल प्राध्यापक संघले एक महिनादेखि पेनडाउन गरेको छ । क्याम्पस आउने विद्यार्थीले पढाइ हुनुपर्ने मुख्य समयमा पनि पढ्न पाएका छैनन् । यहाँ स्नातक तथा स्नातकोत्तर तहको पढाइ हुन्छ । त्रिभुवन विश्वविद्यालयका आंगिक क्याम्पसमा राजनीतिक भागबण्डाका आधारमा क्याम्पस प्रमुख नियुक्त गर्दा पाटन एमाओवादीको भागमा परेको थियो । आन्दोलन गर्ने विद्यार्थी संगठनले क्याम्पसको शैक्षिक सुधारको कुनै एजेन्डा भने अगाडि ल्याएका छैनन् । क्याम्पस प्रमुख श्रेष्ठले विद्यार्थी संगठनसित आफ्नो राजीनामा माग्ने कुनै आधार नरहेको उल्लेख गर्दै 'कांग्रेस समर्थकलाई क्याम्पस प्रमुख बन्ने हतारोले विवाद झिकिएको' बताए । 'व्यक्तिगत लाञ्छना लगाएर राजीनामा गर्न बाध्य पार्ने र आफ्ना मान्छेलाई क्याम्पस प्रमुख बनाउने कांग्रेस- एमाले समर्थकको यो चाल हो,' श्रेष्ठले कान्तिपुरसित भने, 'कुनै गल्ती र अनियमितता नै नगरेको मैले किन राजीनामा दिने ?' विद्यार्थी संगठनले भने प्रमुख श्रेष्ठले क्याम्पसको स्वामित्वमा रहेको ललितपुरको विशालबजार भाडामा अनियमितता गरेको आरोप लगाएका छन् । एमाओवादीपछि अब क्याम्पस प्रमुख हुने पालो कांग्रेसको छ । नेविसंघका इकाइ अध्यक्ष दीपेन वान्तवाले क्याम्पस प्रमुखले समस्या छलफल र शान्तिपूर्ण ढंगबाट समाधान गर्न नखोजेकाले आफूहरू विरोधमा उत्रेको बताए । 'विभिन्न अनियमितताका घटनामा उहाू मुछिनुभएको छ, सहमतिमा छानबिन गरौं र सत्यतथ्य पत्ता लगाऔंभन्दा एकलौटी ढंगले अघि बढ्न खोजेपछि बाध्य भएर राजीनामा मागेका हौं,' वान्तवाले भने । एमाओवादीको अखिल क्रान्तिकारीले भने क्याम्पस प्रमुखले राजीनामा दिन नहुन अडान राखेको छ । यसले विद्यार्थी संगठनबीच विवाद बढाएको छ । क्याम्पस प्रमुख श्रेष्ठले विशालबजार भाडाको निर्णय आफू एक्लैले नभई क्याम्पसको कार्यसमितिले गरेको बताए । एमाओवादी समर्थित अनेरास्ववियु क्रान्तिकारी पाटन क्याम्पस इकाइका अध्यक्ष इमान रानाले क्याम्पस प्रमुखको विरोध गर्ने संगठनहरूसूग कुनै जायज माग र आधार नभएको जनाए । 'यो विश्वविद्यालय सुधारको मुद्दाभन्दा पनि कांग्रेस- एमालेले आफ्नो कोटामा प्रमुख बनाउने खेल रचेका हुन्,' उनले भने । क्याम्पस प्रमुखको प्रवेश नहुँदा लेखा ठप्प छ । लेखा बन्द हुँदा पछिल्लो २ महिनादेखि अध्यापक तथा कर्मचारीले तलब पाएका छैनन् । एकजना उपप्राध्यापकका अनुसार करारमा कुन दल समर्थक कतिजना अध्यापक नियुक्त गर्ने भन्नेबारे पनि कुरा मिलेको छैन । प्रमुखले माओवादी समर्थकलाई बढी प्राथमिकतामा राखेपछि प्राध्यापकहरूले नै विद्यार्थी संगठनको प्रयोग गरेर त्यसको विरोध थालेको ती उपप्राध्यापकले बताए । प्रमुखले भने त्यसलाई स्वीकारेका छैनन् । स्ववियु पदाधिकारी र क्याम्पस प्रमुखको विवादले गत असारको दोस्रो साता पाटन क्याम्पसमा अनेरास्ववियु र अखिल क्रान्तिकारीका विद्यार्थीबीच झडप भएको थियो ।