निर्वाचन आयोगभित्र एनजीओ पसेपछि विवाद

भिडियो हेर्नको माथि को बक्स मा डबल क्लिक गर्नु होस्

१८ साउन, काठमाडौं । निर्वाचन आयोगले आचार संहिता जारी गरेर दल र मिडियालाई अनुशासनमा रहन आग्रह गरेको छ । तर, निर्वाचन आयोग आफैंले चाहिँ एनजीओसँग मिलेर आर्थिक चलखेल गर्न थालेको छ । विभिन्न एनजिओ/आइएनजीओमा काम गरेका व्यक्तिलाई पदाधिकारी बनाएपछि निर्वाचन आयोगभित्र एनजीओ पसेको हो ।

विगत संविधानसभा चुनाव र उपचुनावमा मिडियामा आचार संहिता उल्लंघन भए/नभएको नेपाल प्रेस काउन्सिलले अनुगमन गरेकोमा यसपालि आयोगले मिडिया अनुगमनको जिम्मा एनजिओलाई दिएको भन्दै प्रेस काउन्सिलले आपत्ति जनाएको छ । काउन्सिलका अध्यक्ष बोर्णबहादुर कार्कीले शुक्रबार निर्वाचन आयोगलाई पत्र लेखेर आचार संहिता अनुगमन गर्ने आधिकारिक निकाय प्रेस काउन्सिल रहेको स्पष्ट पार्नुभएको छ ।

निर्वाचन आयोगले मिडियाको आचार संहिता अनुगमन गर्ने जिम्मेवारी आयुक्त इला शर्मालाई दिएको छ । विगतमा विभिन्न एनजिओमा संलग्न शर्माको प्रभाव प्रयोग गर्दै आचार संहिताबारे प्रशिक्षण दिने नाममा केही एनजिओले शर्मामार्फत् सञ्चार प्रशिक्षण शीर्षकमा आयोगबाट बजेट हात पार्न सफल भएका छन् । सोही योजना अुनरुप यसैसाता धुलीखेलको महंगो होटलमा प्रशिक्षण कार्यक्रम राखिएको छ । उक्त कार्यक्रममा प्रशिक्षार्थी पठाइदिन आयोगकै तर्फबाट पत्र आएपछि शुक्रबार काउन्सिलले प्रशिक्षार्थी नपठाउने भन्दै आयोगलाई जवाफ पठाएको छ ।

मिडियामा आचार संहिता उल्लंघन भए, नभएको हेर्ने अधिकार निर्वाचन आयोगलाई नभई प्रेस काउन्सिललाई रहेको जिकिर काउन्सिलका अध्यक्ष बोर्णबहादुर कार्कीको छ । कुनै पनि बाहनामा आयोगले मिडियाको आचारसंहिता अनुगमन गर्न नमिल्ने भन्दै काउन्सिलले अयोगलाई पत्र लेखेको छ ।

‘काउन्सिललाई आफ्नो परिभाषित जिम्मेवारीबाट च्युत हुने गरी आयोगबाटै हठात् अनुगमन गर्ने निर्णयप्रति नीतिगत असहमति रहेको हुँदा प्रशिक्षक प्रशिक्षणका लागि प्रतिनिधि पठाउन नसकिने व्होरा अनुरोध गर्दछु ।’- काउन्सिलका अध्यक्ष कार्कीले आयोगलाई लेख्नुभएको पत्रमा भनिएको छ ।

प्रेस काउसिन्सलका एक सदस्यले अनलाइनखबरलाई दिएको जानकारी अनुसार सञ्चारिका समूह र निर्वाचन आयुक्त इला शर्माको मिलेमतोमा मिडिया अनुगमनका नाममा एनजिओसँग आर्थिक चलखेल शुरु भएको हो । यस विषयमा काउन्सिलका पदाधिकारीले मन्त्रिपरिषद अध्यक्ष खिलराज रेग्मीलाई प्रत्यक्ष भेटेर गुनासो पोखिसकेको बुझिएको छ । स्रोतका अनुसार प्रमुख निर्वाचन आयुक्त नीलकण्ठ उप्रेती पनि प्रेस काउन्सिलको साटो आफू निकट एनजिओलाई प्रजेक्ट पार्न इच्छुक हुनुहुन्छ । यसै विषयलाई लिएर आयुक्त शर्मा र उप्रेतीवीच टकराव समेत परेको स्रोत बताउँछ ।

यसबारे बुझ्न आयुक्त शर्मालाई फोन गर्दा उहाँले मोवाइल रिसिभ गर्नुभएन ।