केदारनाथ भक्तपुरमै, अब भारत जानु पर्दैन (फोटो फिचर)

भिडियो हेर्नको माथि को बक्स मा डबल क्लिक गर्नु होस्

बाढी पहिरोबाट रोकिएको भारतको केदारनाथको दैनिक नित्यपुजा शनिबारदेखि भक्तपुरको डोलेश्वरमा सुरु भएको छ । केदारनाथको शिर भाग मानिने सिपाडोल ६ स्थित डोलेश्वर मन्दिरमा पुजा हुने भएपछि भक्तजनको घुइचो लागेको छ । दर्शन गर्न भारतदेखि भक्तजन आउन थालेका छन् ।

असार २ मा भारत उत्तराञ्चल स्थित केदारनाथ र वरीपरीको क्षेत्रमा बाढीले पुजा रोकिएपछि केदारनाथीको पिठाधीश्वर जगतगुरु श्री भिमाशंकर लिङ्ग शिवाचार्यको आदेश अनुसार डोलेश्वरमा विधिवत रुपमा पुजा सुरु गरेको डोलेश्वर महादेव संरक्षण समितिका कार्यबाहक अध्यक्ष किरण थापाले बताए ।

शिवाचार्यको आदेश अनुसार समितिले आचार्य पण्डित कृष्णप्रसाद खनालको नेतृत्वमा ३३ जना ब्राम्हण लगाएर शनिबार नित्य पुजा गरेको हो । ढोलेश्वरलाई यसअघिसम्म केदारनाथको शिरभाग मानिएपनि नृत्य पुजा हुन थालेपछि 'केदारनाथ धाम' को रुपमा भक्तजनले दर्शन गरेका छन् ।

नेपाल र भारतमा बाढी पहिरोमा परेर मृत्यु भएका मृतआत्माको चिरशान्तिको कामना गर्दै समितिले शनिबार लक्षदीप, प्रज्वलन, रुद्राभिषेक, यज्ञ, हवन र महामृत्युन्जय जप समेत गरेको छ । शनिबारको बिशेष पुजाको अवलोकन र मन्दिर दर्शन गर्न २० हजार भन्दा बढी भक्तजन आएको थापाले बताए । 'दर्शन गर्न भारतीय भक्तजन पनि आउन थालेका छन,'उनले भने ।

शिवाचार्यले ०६६ भदौ ६ मा भक्तपुरको सिपाडोल ६ मा रहेको डोलेश्वर महादेव भारतको उत्तराञ्चलको शिरभाग भएको पुष्टि गरेका थिए । त्यसदिनदेखि हिन्दुधर्मालम्बीहरुले शिरभागको रुपमा पुजा गर्दै आइरहेका छन् ।