लो बजेट फिल्मकै हाईहाई

भिडियो हेर्नको माथि को बक्स मा डबल क्लिक गर्नु होस्

नेपालमा गतवर्ष एक सय बढी फिल्म रिलिज हुँदा कुनै फिल्मले सफलता चाख्न पाएनन् । मुस्किलले पाँच फिल्मले मात्रै लगानी सुरक्षित गरेको तथ्यांक छ । छिमेकको फिल्मको हालत खराब भइरहँदा बलिउडमा भने चकाचक भइरहेको छ । गएको ६ महिनामा मात्रै ५९ फिल्म रिलिज हुँदा १३ फिल्मले नाफा कमाएका छन् । त्यसमा पनि धेरै बजेटका फिल्मले हावा खाइरहँदा लो बजेट फिल्मले अनपेक्षित व्यापार गरिरहेका छन् । गतवर्ष प्रायः दक्षिण भारतीय स्वादका एक्सनवाला फिल्मले कमाइ राम्रो गरे पनि सन् २०१३ मा लभस्टोरीमै दर्शक फर्किएको अनुमान गरिएको छ । आठ करोड भारुमा बनेको लभस्टोरी फिल्म 'आसिकी-२' ले बक्सअफिसमा सय करोड कटाएको थियो । अजय देवगण, सैफअलि खानजस्ता स्टारभ्यालु भएकाका फिल्म 'हिम्मतवाला' र गो गोवा गन' भने सुपरफ्लप बने । ताकि स्टार कास्ट नै नभएका 'आसिकी-२', 'काई पो चे', 'राञ्झना', 'फुकरे', 'चश्मे बद्धुर' जस्ता फिल्मले भने तारिफ मात्रै कमाएनन्, पैसा पनि बटुले । स्टारको इज्जत राख्ने फिल्ममा रणवीर कपुर-दीपिका पादुकोणको 'ए जवानी है दिवानी' र सैफ-दीपिकाको 'रेस-२' रहे । बलिउडमा वर्षमा १५ फिल्म हिट हुनुलाई सफलता मानिन्छ । जबकि सन् २०१३ मा ६ महिनामै १३ फिल्म हिट बनिसकेका छन् । जबकि बाँकी आधा वर्षमा शाहरुख खान, अक्षयकुमार, अजय देवगण, ऋतिक रोशन, रणवीर कपुर र आमिर खानजस्ता हस्तीका फिल्महरु अझैं रिलिजको पंक्तिमा छन् । ५९ फिल्मले ६ महिनामा झन्डै १० अर्बको व्यापार गरेका थिए । यस अवधिमा ३० करोडको 'काई पो चे' ले ५० करोड बढी, ४२ करोड बजेटको 'स्पेसल २६' ले ८० करोड, १२ करोड बजेटमा बनेको 'एबीसीडी' ले ४४ करोड कमाएका थिए । अझ ३५ करोडको लो बजेटमै बनेको 'रांझना' ले १० दिनमा एक सय ३६ करोड कमाइसकेको छ भने ५ करोडमै तयार पारिएको 'फुकरे' ले ३० करोड कमाएर निर्माताको गोजी गहु्रंगो पारेका थिए । यी सबै फिल्म स्टार कास्ट नभएको र प्रायः लभस्टोरी भएकाले कम बजेट मै निर्माण सम्भव भएका हुन् ।