माओवादीका नेताले बोकेको हतियार अबैध

भिडियो हेर्नको माथि को बक्स मा डबल क्लिक गर्नु होस्

२४ असार, काठमाण्डौं । सरकारले विस्तृत शान्ति सम्झौताबमोजिम तत्कालीन माओवादीले राखेका सबै हतियार अवैध भएको जनाएको छ । गृह मन्त्रालयले हतियार बुझाउन पटकपटक ताकेता गरे पनि नबुझाइएका ३२ थान हतियार सरकारले अवैध भएको घोषणा गरेको हो । गृहको यो घोषणासँगै ती हतियार बरामद गर्न प्रहरीलाई बाटो खुलेको छ । तत्कालीन माओवादीले शान्ति प्रक्रियामा आएपछि आफ्ना नेताहरूको सुरक्षाका लागि राखेका हतियारमध्ये ३२ थान अझै पनि सरकारलाई बुझाएको छैन । सरकारले पटकपटक ताकेता गरे पनि ती हतियार बुझाउन माओवादीले कुनै चासो नदेखाएको हो । पछिल्लो पटक सरकारले ती हतियार बुझाउन वैशाख महिनासम्मको अल्टिमेटम दिएको थियो । त्यसबेला गृहले नजिकको सुरक्षा निकायमा हतियार बुझाउन आग्रहसमेत गरेको थियो । अल्टिमेटम दिएको दुई महिना बित्न लाग्दा सरकारले त्यसबारे पुनः चासो प्रकट गरेको हो । माओवादी विभाजित भएपछि ती हतियार कहाँ र कसरी राखिएका छन् भन्ने यकिन हुन सकेको छैन । बरु, एकीकृत माओवादी र त्यसबाट विभाजित बनेको मोहन वैद्य नेतृत्वको नेकपा–माओवादी दुवैले ती हतियार आफूसँग नभएको प्रस्टीकरण दिँदै आएका छन् । गृह मन्त्रालयका प्रवक्ता सहसचिव शंकर कोइरालाले भीआईपी सुरक्षाका नाममा राखिएका ती हतियार अहिलेसम्म सुरक्षा निकायमा नबुझाइएको बताए । ‘मन्त्रालयले तोकेको समयसीमा सकिएको छ, अब कानुनबमोजिम कारबाही हुन्छ,’ प्रवक्ता कोइरालाले भने । एकीकृत माओवादीले आफूसँग ती हतियार नभएको बताइसकेको छ । ‘हामीसँग त्यस्ता हतियार छैनन्, अनमिनलाई बुझाउनुपर्ने हतियार सबै बुझाइसकेको छौं,’ एकीकृत माओवादीका केन्द्रीय सदस्य देवेन्द्र पौडेलले भने । एकीकृत माओवादीले ती हतियार वैद्य नेतृत्वको नेकपा माओवादीसँग भएको संकेत गरेको थियो । प्रत्युत्तरमा माओवादीले ती हतियार पेरिसडाँडास्थित एकीकृत माओवादीकै कार्यालयमा रहको जनाएको थियो । स्रोतका अनुसार एकीकृत माओवादीका नेताहरूले आफूबाट फुटेर गएको नेकपा माओवादीका नेताहरूले आफ्नो सुरक्षाका लागि ती हतियार राखेको बताएका थिए । यद्यपि, स्पष्ट प्रमाण नदिएकाले प्रहरीले ती हतियार बरामद गर्न नसकेको राजधानी दैनिकमा खबर छ । गृहले सरकारले ती सबै हतियार अवैध भएको घोषणा गरिसकेकाले प्रहरीले कुनै पनि बेला बरामद गर्न सक्ने जनाएको छ । ‘सुरक्षाकर्मीले देखे अब ती हतियार बरामद हुनेछन्, खोजीका लागि प्रहरी हब सक्रिय हुनेछ,’ गृह प्रवक्ता कोइरालाले भने ।