मुगल ए आजम उत्कृष्ट

भिडियो हेर्नको माथि को बक्स मा डबल क्लिक गर्नु होस्

सय वर्ष पुरानो इतिहास बोकेको हिन्दी सिनेमा बलिउडको उत्कृष्ट फिल्म कुन होला? ६०औं दसकमा निर्मित हिन्दी फिल्म मुगल ए आजम सबैभन्दा उत्कृष्ट फिल्म रहेको हालै बेलायतमा गरिएको एक सर्वेक्षणले देखाएको छ। हिन्दी सिनेमा सय वर्ष पूरा गरेको उपलक्ष्यमा गरिएको उक्त सर्वेक्षणमा विदेशीले पनि सो फिल्मलाई रुचाइएको देखाएको छ। मुगल ए आजमलाई पहिलो नम्बर दिँदै ब्रिटिस एसिया साप्ताहिक पत्रिका 'इस्टर्न आइ'ले गरेको सर्वेक्षणमा रमेश ‌सिप्पीले बनाएको फिल्म 'शोले' दोस्रो नम्बरमा परेको थियो। मुगल ए आजम १९६० अगस्ट ५ मा रिलिज गरिएको थियो। यो फिल्म बनाउन करिब एक करोड पाँच लाख खर्च गरेको निर्माण पक्षको दाबी छ। उक्त फिल्म बनाउनमात्र सात वर्ष लागेको थियो। त्यो समयमा पनि यो फिल्मलाई एक सय पचास हलमा एक साथ रिलिज गरिएको थियो। के आसिफले निर्देशन गरेको उक्त फिल्ममा मधुबाला, पृथ्वीराज कपुर र दिलीप कुमारको मुख्य भूमिका रहेको थियो। मुगल ए आजम र शोलेबाहेक क्रमशः दिलवाले दुल्हनियां ले जाएंगे, मदर इंडिया, आवारा, दीवार, थ्री इडियट्स, कभी कभी, अन्दाज र मैंने प्यार किया फिल्म परेका छन्।