भिडियो हेर्नको माथि को बक्स मा डबल क्लिक गर्नु होस्
पाल्पा, श्रावण ५ - कान्तिपुरमा शुक्रबार प्रकाशित समाचारको विषयलाई लिएर भरतपुरबाट तानसेन ल्याईंदै गरेको कान्तिपुर र दी काठमाडौं पोष्ट तानसेनदेखि ८ किलोमिटर टाढा बाँसटारीमा जलाएका छन् । वुटवलबाट तानसेन आउँदै गरेको लु १ ख ४४०३ नम्बरको बसबाट पत्रिका ओराले युवा संघका केन्द्रीय सदस्य सुरेन्द्र पाण्डेयको नेतृत्वमा आएका मदनपोखरा दमकडा र माडीफाँट क्षेत्रका युवाहरुले पत्रिका जलाएका हुन् । जलाएकै बेला प्रहरी पुगेर निभाउने प्रयास गरेको र १०/१२ जना युवालाई नियन्त्रणमा लिएको प्रहरी नायव उपरीक्षक स्थानेश्वर रेग्मीले बताए । तानसेनमा श्रेष्ठ न्यूज, न्यू हिमाली र बीबी डिष्टिव्यूटर्समा पत्रिका आउँछ । यसअघि शुक्रबार साँझ स्थानीय बासिन्दाले चुनावी मन्त्रिपरिषद्का अध्यक्ष खिलराज रेग्मीको गाँउ पोखराथोक र मदनपोखराको दमकडामा कान्तिपुर जलाएका हुन् । पोखराथोकको गाविस भवन नजिकै भेला भएका स्थानीयले विकास विरोधी समाचार लेखेको भन्दै पत्रिका जलाएका हुन् । स्थानीय बासिन्दाले पत्रिकाले विकासको विरोधमा लेखेको जनाउँदै कोणसभासमेत गरेका थिए । दमकडामासमेत स्थानीय बासिन्दाले पत्रिका जलाएका थिए । युवा संघका केन्द्रीय सदस्य सुरेन्द्र पाण्डेयले माडी चक्रपथको विकासले सबैलाई फाइदा पुग्ने बताएका थिए । पत्रिका जलाएको विषयलाई लिएर जिल्ला पत्रकार महासंघले भने कुनै प्रतिक्रिया जनाएको छैन । यसैबीच पूर्वसांसद सोमप्रसाद पाण्डेयले विज्ञप्ति निकालेर पाल्पाको वस्ती विकास र कृषि उत्पादन वृद्धिका लागि माडीफाँट समग्र विकास योजना पहिला देखिकै माग भएको जनाएका छन् । स्थानीय जनताको मागवमोजिम सरकारले २०५२ सालको बजेट तथा कार्यक्रममा पहिलो पटक माडीफाँट रिङ्गरोड (माडीफाँट चक्रपथ) को नामबाट योजना समावेश गरेकोसमेत उनले बताए । सोही योजनाकै निरन्तरताकै रुपमा आर्थिक वर्ष २०७०।०७१ को बजेट वक्तव्यमा यो योजना समावेश भएको बताउँदै उनले पाल्पालीहरुको निरन्तर पहलकदमीबाटै ल्याइएका विकास सम्बन्धि यस योजनालाई नयाँ योजनाको रुपमा नबुझिदिन र मन्त्रिपरिषदका अध्यक्ष खिलराज रेग्मीसँग मात्र नजोड्न अनुरोध गरेका छन् । कान्तिपुर पब्लिकेसन शाखाले पत्रिका जलाइएको भन्दै भर्त्सना गरेको छ । शाखाका अध्यक्ष अतुल मिश्रले कान्तिपुर दैनिक र दी काठमाडौं पोष्ट जलाइएकोमा आपत्ति भएको विज्ञप्तीमा उल्लेख गरेका छन् ।
Post a Comment
http://filmysangalo.blogspot.com/ कुनै मान्यता प्राप्त पत्रकार बाटसंचालित होईन | यो ब्लग बाट प्रकासित हुने सामाग्रीहरु नेपालको मान्यता प्राप्त पत्रपत्रिकाहरु र Youtube बाट प्रतिलिपि गरी Facebook मार्फत श्रोता सामुपुर्याउने सानो जमर्को मात्र गरेका हौ |
Note: Only a member of this blog may post a comment.