चुनावको मिति सार्ने कुरा स्वीकार्य हुँदैन : कोइराला

भिडियो हेर्नको माथि को बक्स मा डबल क्लिक गर्नु होस्

अर्जुन राजवंशी

६ साउन, विराटनगर । नेपाली काँग्रेसका सभापति सुशील कोइरालाले वार्ता र सहमतिको नाममा मंसिर ४ का लागि तोकिएको निर्वाचनको मिति सार्ने कुरा कुनै पनि हालतमा स्वीकार्य नहुने वताउनु भएको छ । कोइरालाले राष्ट्रिय, अन्तर्राष्ट्रिय तथा आम नेपाली जनताको चाहना निर्वाचन नै भएकाले तोकिएकै समयमा निर्वाचन गराउनु पर्ने वताउनु भयो ।

३२ औँ विपी स्मृति दिवसको अवसरमा आइतवार विहान विराटनगरमा आयोजित कार्यक्रमलाई सम्बोधन गर्दै कोइरालाले भारत, चीन, अमेरिका तथा युरोपियन युनियनको चाहना नेपालमा मंसिर ४ मै निर्वान होस् भन्ने रहेकाले अव यो वा त्यो बहानामा निर्वाचनको मिति सार्न नुहने वताउनुभयो ।

उहाँले मंसिर ४ मा कुनै हालतमा पनि संविधानसभाको दोस्रो निर्वाचन भएरै छाड्ने ठोकुवा गर्नु भयो । कोइरालाले अहिले निर्वाचनको उत्साह र चाहना बढेकाले असन्तुष्ट दलहरुलाई निर्वाचनमा सहभागी गराउन जनताले पनि दवाव सिर्जना गर्नु पर्ने बताउनु भयो । उहाँले असन्तुष्ट दलहरुसंग वार्ताका लागि उच्चस्तरीय राजनीतिक समिति निरन्तर लागिरहेकोले केही दिन भित्रै असन्तुष्ट दलहरुसंग वार्ता हुने बताउनु भयो ।

कोइरालाले उच्चस्तरीय राजनीतिक समितिका संयोजक पुष्पकमल दाहाल प्रचण्ड र आफुले नेकपा-माओवादीका अध्यक्ष मोहन वैद्य किरण र मधेशी जनअधिकार फोरम नेपालका अध्यक्ष उपेन्द्र यादवसंग कुराकानी गरिरहेको र निर्वाचनप्रति सकारात्मक रहेको आफुले पाएको जानकारी दिनुभयो ।