एउटै जिल्लाबाट हराए ४० हजार मतदाता

भिडियो हेर्नको माथि को बक्स मा डबल क्लिक गर्नु होस्

२३ असार, तेहथ्रुम । अघिल्लो संविधानसभामा ९० हजार मतदाता रहेको जिल्लामा ६ वर्षपछि हुन लागेको चुनावमा मतदाता संख्या बढ्नुपर्नेमा झण्डै ४० हजार मतदाता घटेको पाइएको छ । जनसंख्या वृद्धिसँगै मतदाता बढ्नुपर्नेमा ०६४ सालको चुनावमा ९० हजार ९ सय ३५ मतदाता रहेको तेह्रथुम जिल्लामा यसपालि ५२ हजार ५ सयको मात्रै मतदाता नामावलीमा नाम संकलन भएको छ ।

केही मतदाता नामावली अझै संकलन गर्न बाँकी रहेको जिल्ला निर्वाचन कार्यालयले जनाएको छ । तर, नामावली संकलन कार्य अधिकांश सकिइसकेको अवस्थामा यसपालिको चुनावमा गत निर्वाचनमा भन्दा कम मतदाता देखिने स्रोतको विश्लेषण छ ।

एउटा मात्रै निर्वाचन क्षेत्र रहेको तेह्रथुमको यो स्थितिले पहाडी जिल्लामा विगतकोभन्दा मतदाता संख्या घटेको संकेत गरेको छ । विश्लेषकहरुका अनुसार पहाडी जिल्लामा मतदाता संख्या घट्नुका दुई कारण छन्, एक बसाइँ सराइ र दोस्रो वैदेशिक रोजगारीका बढ्दो विदेश पलायन ।

कुल १ लाख ५१ हजार जनसंख्या मध्ये तेह्रथुममा वालिगहरुको संख्या ६४ हजार छ । त्यसमध्ये अहिलेसम्म ५२ हजार ५ सयको मतदाता नामावली संकलन भएको छ । अघिल्लो संविधानसभामा मतदाता सूचीमा नाम समावेश भएका ९० हजार ९ सय ३५ मध्येबाट ५१ हजार २४ जनाले मतदान गरेका थिए । एउटा मात्रै चुनावी क्षेत्र भएको तेह्रथुममा अघिल्लो संविधानसभामा नेपाली काँग्रेसका तुलसी सुब्बाले १९ हजार ७ सय मत पाएर जित्नुभएको थियो । दोस्रो स्थान हासिल गरेको एमालेले १६ हजार मत पाएको थियो भने एमाओवादीले ११ हजार मत ल्याएर तेह्रथुममा तेस्रो स्थान हासिल गरेको थियो ।

जिल्लामा अझै लागेन चुनाब

दोस्रो संविधानसभाको मिति तोकिएको दुई साता वित्दापनि राजनीतिक दलहरु सक्रिय नबन्दा तेह्रथुमवासीले मंसीर ४ मा चुनाव हुने कुरा पत्याएका छैनन् । राजनीतिक दलहरुले चुनावलाई लक्षित गरेर जिल्लामा अहिलेसम्म कुनै कार्यक्रम सुरु गरेका छैनन् । तेह्रथुममा रहेका १३ दलमध्ये अधिकांश दल जिल्ला निर्वाचन कार्यालयमा समेत गएका छैनन् । जिल्ला निर्वाचन अधिकारी डम्मरुबल्लभ बराल भन्नुहुन्छ- ‘पटक-पटक फोन गरेर र भेटेर पनि मतदाता नामावली लैजानुस्, कोही छुटेका छन् भने खबर गर्नुस् भन्दा पनि दलहरु उदासीन देखिएका छन् ।’ राजनीतिक दलहरुका जिल्ला कार्यालयहरुमा पनि चुनावको कुनै रौनक देखिँदैन । अधिकांश दलका कार्यालयमा नेता कार्यकर्ता भेटिँदैनन् ।

एमालेका जिल्ला सचिव विष्णुविक्रम तुम्बाहाङ्फे भर्खरै पार्टीको केन्द्रीय कार्यक्रम अन्तरगतको एक महिने अभियान सकिएकाले अहिले गाउँ नगएको बताउनुहुन्छ । उहाँले यतिबेला खेतिपातीको सिजन भएकाले पनि गाउँमा चुनावी माहौल नदेखिएको बताउनुभयो । अघिल्लो संविधानसभामा जिल्लाबाट चुनाव जितेको नेपाली काँग्रेसको पनि यसपटक चहल-पहल देखिँदैन । आन्तरिकरुपमा चुनाबको तयारी भइरहेको र यसअघि गाउँमा कांग्रेसले अभियानसमेत सञ्चालन गरिसकेको जिल्ला सचिव अर्जुन तुम्बाहाङ्फे बताउनुहुन्छ । एमाओवादीका कार्यालय सचिव राजेन्द्र बराल मंसीर ४ मै चुनाव हुने दाबी गर्नुहुन्छ । उहाँले पार्टीको आन्तरिक सुदृढीकरण कार्यक्रम भइरहेको र केन्द्रबाट घोषणापत्र आएपछि चुनावी प्रचारमा जाने बताउनुभयो ।

वैद्य समूहको ३३ दलमा मोर्चावद्ध भएको मञ्च सम्बद्ध संघीय लिम्बुवान राज्य परिषदका जिल्ला अध्यक्ष देवनारायण सम्बाहाङ्फे भने मंसीर ४ मा कुनै हालतमा चुनाव नहुने दाबी गर्दै सरकारले जबरजस्ती गर्न खोजे चुनाब बिथोलिने बताउनुहुन्छ । त्यस्तै चुनावको विरोधमा रहेको नेकपा-माओवादीका जिल्ला इञ्चार्ज पनि रेग्मी सरकारबाट चुनाव हुनै नसक्ने दाबी गर्नुहुन्छ । उहाँले आफ्नो पार्टी कुनै पनि बहानामा यो चुनावमा गए आफुहरु पार्टीमा नरहने बताउनुभयो ।

अशोक राई नेतृत्वको संघीय समाजवादी पार्टीका जिल्ला अध्यक्ष कपिलदेव लिम्बु अहिलेसम्म चुनावको माहोलै तयार नभएकाले मंसिर ४ मा चुनाव हुने सम्भावना नदेखेको बताउनुहुन्छ । कुल ३८ प्रतिशत लिम्बु जाति रहेको तेह्रथुममा यसपटक जातीय तथा पहिचानको मुद्दाले पनि प्रमुख दलहरुलाई असर पार्ने सम्भावना देखिएको छ । दोस्रो स्थानमा रहेको एमालेमा विभाजन आई केही केना कार्यकर्ता अशोक राईको संघीय समाजवादीतिर लागेका छन् भने तेस्रो स्थानमा रहेको एमाओवादीमा पनि विभाजन आएको छ । त्यसो त पहिलो स्थानमा रहेको कांग्रेसलाई पनि यसपालि जातीय नाराले प्रभाव पार्ने विश्लेषण जिल्लाबासीहरुको छ ।

नेताहरुले जस्तै जिल्लाका सर्वसाधारण पनि मंसीर ४ मा हुनेमा विश्वस्त छैनन् । प्रमुख जिल्ला अधिकारी किशोर चौधरी भने चुनावका लागि जिल्लामा दह्रो सुरक्षा योजना बनाइसकेकाले सरकारले चुनाव गराए जिल्लामा समस्या नभएको बताउनुहुन्छ ।

- See more at: http://www.onlinekhabar.com/2013/07/90826/#sthash.HQDpCGBf.dpuf