मन्दिर प्रवेश गर्न खोज्दा दलितका ६० घर भत्काइए

भिडियो हेर्नको माथि को बक्स मा डबल क्लिक गर्नु होस्

२६ जेठ, रौतहट । मन्दिर प्रवेशमा रोक लगाएको विरुद्धमा दर्ता गरिएको मुद्दा दर्ता फिर्ता दिन नमानेपछि रौतहटमा दलित परिवारमाथि कुटपिट हुनुका साथै ६० घरधुरीमा तोडफोड भएको छ । दलित बस्तीमा गैरदलित समुदायले शुक्रबार राति गरेको सामूहिक आक्रमणमा दुई दर्जनको संख्यामा दलित समुदायका सदस्य घाइते भएका छन् । रौतहट जिल्लाको पिपरिया दोस्तिया गाविसको भिण्डावर टोलमा रहेको दलित बस्तीमा गैरदलितले आक्रमण गरेपछि सो बस्तीमा रुवाबासी चलेको छ । गाउँको मध्यभागमा रहेका चमार समुदायलाई एक महिनाअघि स्थानीय क्षेत्रमा रहेका मन्दिर प्रवेशमा गैरदलितले रोक लगाएपछि दलित समुदायले गैरदलितविरुद्ध मुद्दा दर्ता गराएका थिए । स्थानीय रामचन्द्र राय, विजय साह, सिकिन्द्र पण्डित, पसिन्द्र यादव, रामेश्वर यादव र हृदयनारायण यादवसहितको समूहले दलित बस्तीमा आक्रमण गरेको थियो । गैरदलित समुदायको आक्रमणबाट स्थानीय गुरुदयाल राम, महावीर राम, पार्वतीदेवी राम, सुनितादेवी राम, जितनीदेवी रामलगायतका १८ जना घाइते भएका छन् । घाइतेहरूको गरुडास्थित अनामिका अस्पताल र जिल्ला अस्पताल गौरमा उपचार भइरहेको रौतहटका प्रहरी उपरीक्षक गोविन्द परियारले जानकारी दिए । अधिकांश घाइतेहरूलाई लाठी र इँटाले प्रहार गरिएको प्रहरीले जनाएको छ । दलित बस्तीका महिला र केटाकेटीलाई अरूको शौचालय जानसमेत नदिएर दलित बस्ती नै घेरा हालेर कुटपिट गर्नुका साथै घर तोडफोड गरेको घाइते गुरुदयाल रामले जानकारी दिए । गैरदलितले दलितका घरमा रहेको भाँडाकुँडा, टिभी, दराज, घरको भित्ता र छानासमेत तोडफोड गरेका छन् । दलित बस्तीमा रहेका खानेपानीका ट्युबवेलको ह्यान्डिलसमेत भाँचिदिएका कारण आफूहरूलाई पानी खानसमेत समस्या रहेको पीडितहरूले गुनासो गरेको नयाँ पत्रिका तथा राजधानी दैनिकमा खबर छ । स्थानीय बासिन्दाले घटना भएको चार घन्टापछि प्रहरी आएको भन्दै आक्रोश व्यक्त गरेका थिए । इलाका प्रहरी कार्यालय गरुडाका प्रहरी निरीक्षक भेषराज रिजालले घटनाको भएको थाहा पाउनासाथ आफूहरू घटनास्थल पुगेको दाबी गरे । योजना नै बनाएर कुटपिट तथा तोडफोड भएको नेपाल उत्पीडित जातीय मुक्ति समाज रौहतटका अध्यक्ष नाथुराम परियारले बताए । घटनापछि राति नै चन्द्रनिगाहपुरबाट प्रहरी निरीक्षक नन्दलाल साह र इलाका प्रहरी कार्यालय गरुडाका प्रहरी निरीक्षक रिजालको नेतृत्वमा गएको प्रहरी टोलीलाई स्थानीय बासिन्दाले एकले अर्कोको पक्षधर भन्दै पानीसमेत खान दिएका थिएनन् । शनिबार बिहान रौतहटका प्रमुख जिल्ला अधिकारी दिलबहादुर घिमिरे, प्रहरी उपरीक्षक गोविन्दराम परियार, सशस्त्र प्रहरी उपरीक्षक प्रेमराज पोख्रेल र अधिकारकर्मीहरूको टोलीले घटनास्थलको निरीक्षण गरेको थियो । घटनास्थलमै पत्रकारहरूसँग कुरा गर्दै प्रमुख जिल्ला अधिकारी घिमिरेले घटनामा संलग्न हुनेलाई कुनै पनि हालतमा नछोडिने बताए । पीडित परिवारलाई तत्काल रेडक्रसको सहयोगमा त्रिपाल र अन्य आवश्यक वस्तुको प्रबन्ध मिलाउने उनले जनाए । दलित परिवार घरमा बस्न नसकेको अवस्थामा स्थानीय प्रहरी प्रशासनले सुरक्षा दिएर भए पनि उनीहरूलाई घरमै बस्न सक्ने वातावरण बनाइने प्रहरी उपरीक्षक परियारले दाबी गरे । घटनालगत्तै प्रहरीले वडा नम्बर–८ का रामदेवराय यादव र छोटेलाल यादवलाई नियन्त्रणमा लिएको प्रहरी उपरीक्षक परियारले जानकारी दिए ।