पीडितको काँधमा चढ्ने टीभी पत्रकार बर्खास्त

भिडियो हेर्नको माथि को बक्स मा डबल क्लिक गर्नु होस्

१३ असार, काठमाण्डौ ।  भारतको उत्तराखण्डमा आएको विनाशकारी बाढी र त्यसले पारेको प्रभावको खबर प्रसारण गर्न एक पीडित व्यक्तिको काँधमा चढ्ने पत्रकार बर्खास्त भएका छन् । यो भिडियो सामाजिक सञ्जालबाट सार्वजनिक भएपछि पत्रकारको कडा आलोचना भएको थियो । बाढी पीडितको बाँधमा चढेर रिपोर्टिङ गर्ने पत्रकार न्यूज एक्सप्रेस नामको टीभीका नारायण परगाईं हुन् । मंगलबार उनलाई बर्खास्त गर्दै च्यानलले पत्रकारको व्यवहारलाई ‘अमानवीय’ भनेको छ । साथै यो फुटेज टीभीबाट प्रशारण नगरिएको भन्दै भिडियो कसले अपलोड गर्‍यो भन्ने जानकारी नभएको बताएको छ ।

अहिलेसम्म हजारौंले हेरिसकेको यो भिडियोमा पत्रकार पानीमा उभिएको एक व्यक्तिको काँधमा चढेर क्यामराको अगाडी बोलिरहेको देखिन्छ ।बर्खास्तीमा परेका पत्रकार परगाईले भने आफूले बाढी पीडितहरुलाई सहयोग गरेको दावी गरेका छन् । आफूले केही पैसा र खाद्य सामाग्री दिएका ती व्यक्तिलाई सहयोग गरेको र आफू जस्तो व्यक्ति पहिलोपटक आफ्नो घरमा आएका ती व्यक्तिले सम्मान व्यक्त गर्न यस्तो गरेको उनको दावी थियो । एक अनलाइनसँगको कुराकानीमा आफ्नो कदम गलत भएको स्वीकार गरेका परगाईंले दोष भने क्यामेरा पर्सनलाई दिएका छन् ।

उनले भनेका छन्-’यो खबर मेरो छातिभन्दा माथिको भाग मात्र देखाएर प्रशारण गर्नुपथ्र्यो । यो पूर्ण रुपमा क्यामरा पर्सनको गल्ती हो । किनकी उनले भिडियोमा ती व्यक्तिलाई पनि देखाएका छन्, जसको काँधमा म चढेको थिएँ ।’भारतको उत्तराखण्डमा आएको बाढीका कारण झण्डै १ हजारको ज्यान गएको छ भने हजारौं मानिस प्रभावित भएका छन् । अहिले पनि बाढी प्रभावितहरुको उद्दार कार्य जारी रहेको छ । -एजेन्सीको सहयोगमा