कैदीद्वारा कारागार भित्रै आत्महत्या

भिडियो हेर्नको माथि को बक्स मा डबल क्लिक गर्नु होस्

बझाङ, चैत्र २४ - बझाङ कारागार भित्र एक जना कैदीले आत्महत्या गरेका छन् । कर्तव्य ज्यान मुद्धामा सजाय भोगिरहेका सुवेडा गाविस १ खगेडाका २६ वर्षीय हरीप्रसाद जैसीले चामलको थैलीको डोरी बनाई कारागारको शौचालयमा झुण्डिएर आत्महत्या गरेको प्रहरी नायव उपरीक्षक उदय तामाङले बताए । तामाङका अनुसार शुक्रबार राति एक बजे तिर आत्महत्या गरेका जैशीले २०६८ साल मसिर २२ गते आफ्नै बाजे नाता पर्ने पुरन जैशीको हत्या गरेका थिए । २०६८ साल पुस २० गतेको बझाङ जिल्ला अदालतको फैसला पछि जैशी कारागार चलान भएका थिए । आत्महत्या गरेका जैसी नेपाली सेनाका भगौडा जवान रहेको उपरीक्षक तामाङले बताए । सुरक्षाकर्मी बाहीर बस्ने भएकोले राति सबै सुतेको बेला शौचालयको ढोका थुनी कैदीले आत्महत्या गरेको जिल्ला कारागार बझाङका जेलर मिन लामिछानेले बताए । मृतक जैसीको शवको जिल्ला अस्पताल बझाङले पोष्टमार्टम गरिसकेको अस्पताल स्रोतले जानकारी दिएको छ ।