स्ववियु निर्वाचन जेठ १३ गते नेविसंघको अनसन तोडियो

भिडियो हेर्नको माथि को बक्स मा डबल क्लिक गर्नु होस्

काठमाडौ, चैत्र २४ - त्रिभुवन विश्वविद्यालयले स्वतन्त्र विद्यार्थी युनियनको चुनाव आगामी जेठ १३ गतेका लागि तोकेको छ । प्रत्येक २ वर्षमा हुनुपर्ने स्ववियु निर्वाचन ०६५ सालयता हुन सेकेको छैन । त्रिवि कार्यकारी परिषद्को शनिबार बसेको बैठकले उक्त तिथी तय गरेको हो । त्रिविका रेक्टर गुणनिधी न्यौपानेले शुक्रबार बसेको त्रिवि सभा बैठकले मिश्रित प्रणालीबाट स्ववियु निर्वाचन गराउने बाटो खोलेपछि तिथी तय भएको बताए । मिश्रित प्रणालीमा अध्यक्ष, सचिव र कोषाध्यक्ष प्रत्यक्ष निर्वाचनबाट उपाध्यक्ष र सहसचिवको निर्वाचन स्ववियु पदाधिकारीबाट हुने तथा ५० प्रतिशत प्रत्यक्ष र ५० प्रतिशत समानुपातिक पद्दतिबाट कार्यसमिति चयन गरिने प्रावधान राखिएको छ । यसैबीच, स्ववियु निर्वाचन माग गर्दै नेपाल विद्यार्थी संघले थालेको आमरण अनसन तोडिएको छ । अनसनकारीसंग शनिबार बिहान तत्काल निर्वाचनको तिथी तोकिने त्रिवि प्रशासनले प्रतिवद्धता जनाएपछि अनसन तोडिएको थियो । स्ववियु निर्वाचनको तिथि, त्रिवि शैक्षिक क्यालेन्डरको कडाईका साथ पालना लगायतको माग राखेर नेविसंघ आन्दोलरत् थियो । ११ दिन रिले अनसन बस्दा माग सुनुवाई नभएपछि नेविसंघका ५ जना विद्यार्थी बिहीबारदेखि उपकुलपति कार्यालय अगाडि आमरण अनसनमा बसेका थिए । नेविसंघका प्रवक्ता युपी लामिछानेले स्ववियु निर्वाचन तिथी र आगामी शैक्षिक सत्रदेखि कडाईका साथ शैक्षिक क्यालेन्डर लागु गर्ने सम्बन्धमा त्रिवि विद्यार्थी तथा खेलकुद शाखा प्रमुख गंगाबहादुर थापा र अनसनमा बसेका त्रिवि नेविसंघ ईकाई सभापति कैलाश कोइरालबीच लिखित सम्झौता भएको बताए । नेविसंघले स्ववियु निर्वाचनलाई पनि त्रिविको क्यालेन्डरमा समावेश गरिनुपर्ने भनेको छ ।