भिडियो हेर्नको माथि को बक्स मा डबल क्लिक गर्नु होस्
२८ फागुन, काठमाडौं । वैदेशिक रोजगारीको सिलसिलामा गत पुस र माग महिनामा नेपाली कामदारहरु ६८ देशमा छरिएका छन् । यीमध्ये इजरायल, लेबनान, जोर्डन, साइप्रस र जर्मनी जानेहरुमा पुरुषभन्दा महिलाको संख्या बढी देखिएको छ । कोरियाको इपीएस कोटामा पुरुषको तुलनामा महिलाको संख्या अति न्यून देखिएको छ ।
महिला कामदारले कहाँ-कहाँ जिते ?
वैदेशिक रोजगार विभागको तथ्यांक अनुसार पुस महिनामा जर्मनी जाने पुरुषको संख्या शून्य देखिएको छ भने महिलाको संख्या २२ रहेको छ । माघमा ३ पुरुष र ४५ महिला जर्मनी गएका छन् ।
लेबनान, जोर्डन, इजरायल र साइप्रसमा नेपाली पुरुषभन्दा महिला कामदारहरु बढी गएका छन् । साइप्रसमा पुसमा ४ जना र माघमा ३ जनामात्रै पुरुषहरु गएकोमा नेपाली महिलाहरु पुसमा ७२ जना र माघ मसान्तसम्म १ सय ७३ जना पुगेका छन् ।
लेवनान जाने महिलाको संख्या पुसमा ६० रहेको छ भने माघमा बढेर १ सय ३७ पुगेको छ । जबकि पुरुषहरु पुसमा १० र माघमा ३१ जनामात्रै लेवनान गएको सरकारी तथ्यांकमा देखाइएको छ ।
त्यस्तै इजरायल जाने नेपाली महिलाको माघको संख्या ४७ छ भने पुरुषहरुको संख्या १२ मात्र छ । जोर्डनमा पनि नेपाली महिलाले पुरुष कामदारलाई जितेका छन् । माघमा ८१ महिला जोर्डन पुगेका छन् भने पुरुषको संख्या २२ मात्र छ । पुसमा ४१ नेपाली महिला जोर्डन पुगेकोमा पुरुषको संख्या १८ छ ।
उत्तरी युरोपको बाल्टिक क्षेत्रमा पर्ने लातभिया गणतन्त्रमा गत पुसमा १५ र माघमा ३३ जना नेपाली महिलाहरु पुगेको विभागको तथ्यांकमा उल्लेख छ । उक्त देशमा पुसमा ६ जना र माघमा १४ जनामात्रै नेपाली पुरुषहरु पुगेका छन् । त्यस्तै इजिप्टमा पनि माघमा २ पुरुष र ७ महिलाहरु पुगेका छन् । ट्युनिसियामा माघमा ३ महिला मात्रै पुगेका छन् ।
कुबेतमा महिला पुरुष हाराहारी
कुबेत जस्तो देशमा वैदेशिक रोजगारीमा जाने नेपाली पुरुषकै हाराहारीमा महिलाको संख्या देखिएको छ । माघमा कुबेत जाने पुरुषको संख्या ८ सय ९२ छ भने महिलाको संख्या ८ सय ६२ छ । त्यस्तै ओमनमा माघ महिनामा १ सय ३३ पुरुषहरु पुगेका छन् भने महिला ९७ छन् ।
वैदेशिक रोजगारीका लागि महत्वपूर्ण गन्तव्य मानिने १३ देश बाहेक अन्य देशहरुमा संस्थागत एवं व्यक्तिगतरुपमा गएका नेपालीहरुको संख्याबारे विश्लेषण गर्दा पुरुषको संख्या ३ सय ४३ छ भने महिलाको संख्या २ सय ८ देखिएको छ ।
महिलाको बढ्दो उपस्थिति
वैदेशिक रोजगारीमा पुरुषहरुको संख्यामा न्यून उपस्थिति देखिए पनि मलेसिया, कतार, साउदी र युएईजस्ता देशमा नेपाली महिला पनि बढी नै जान थालेको तथ्यांकमा देखिएको छ ।
कतारमा माघ महिनामा १० हजार ९४ पुरुषहरु गएका छन् भने १ सय ८५ जना महिला भएका छन् । त्यस्तै मलेसियामा माघ महिनामा १२ हजार १ सय ५ जना पुरुषहरु कामका लागि गएका छन् । माघमा मलेसिया जाने महिला कामदारको संख्या ४ सय ५२ देखिएको छ । गत माघ महिनामा साउदी अरेबियामा ६३ नेपाली महिलाहरु कामका लागि पुगेका छन् भने बहराइनमा ३३ नेपाली महिला एकै महिनामा कामका लागि पुगेका छन् ।
गत पुस र माघको आँकडा हेर्दा नेपाली महिलाहरु अजरबैजान, ब्राजिल, बु्रनाई, डेनमार्क, रसिया, ट्युनिसिया, लगायतका देशहरुमा पुगेका छन् । माघ महिनामा रोजगारीका लागि हङकङ जाने महिलाको संख्या २ मात्र देखाइएको छ भने जापान १८, फ्रान्स एक, क्यानडा १० जना देखाइएको छ । माघमा २८ जना पुरुष र १ जना महिला चीन गएका छन् ।
कोरियाको इपीएसमा ठगिए महिला
इपीएसको सरकारी कोटामा कोरिया जानेहरुमा पुरुषको तुलनामा महिलाको संख्या अत्यन्तै न्यून देखिएको छ । माघ महिनामा १ सय ७१ पुरुषहरु दक्षिण कोरिया गएकोमा महिलाको संख्या भने १० मात्रै रहेको छ ।
गत पुसमा इपिएस कोटामा कोरिया जाने पुरुषको संख्या ४ सय ९९ रहेकोमा महिलाहरु २३ जना परेका छन् ।
इराकमा नेपालीहरु प्रसस्तै जाने गरेका भए पनि सरकारी आँकडामा शून्य देखाइएको छ । इरान र पाकिस्तानमा दुई महिनायता दुईजना पुुरुषहरु गएको देखाइएको छ ।
अमेरिका कति भासिए ?
डीभी परेर वा विभिन्न कारणले अमेरिका जानेहरुको संख्या युरोपेली देशको तुलनामा निकै बढी देखिएको छ । पुस महिनामा मात्रै ४९ पुरुष र २० महिला अमेरिका गएका छन् भने माघमा ८४ पुरुष र २६ महिला अमेरिका भासिएका छन् ।
कुन-कुन देशमा पुगे नेपाली ?
वैदेशिक रोजगारीका लागि खुलेका बाहेक अन्य देशमा व्यीक्तगत रुपमा नेपालीहरु छरिएका छन् । सरकारी तथ्यांकमा देखाइए अनुसार इथियोपिया, पूर्वी टिमोर, दक्षिण अफि्रका, सोमालिया, दक्षिण सुडान, पपुवा न्युगिनी, अंगोला, यमन, युगान्डा, तान्जिनिया,रसिया, पोल्याण्ड, न्युजिल्याण्ड, मोजाम्बिक, मोरिसस, मालदिभ्स मकाओ, कंगोलगायतका देशमा फाट्टफुट्ट नेपालीहरु पुगेका छन् । यीमध्ये पूर्वी टिमोर र मकाओमा महिलासमेत छन् भने अरु देशमा पुरुषहरु मात्र छन् । युरोपेली मुलुकमा नेपालीको संख्या उल्लेख्य छ । दुई महिना यतामात्रै ६८ मुलुकमा नेपालीहरुले पाइला टेकेको विभागको तथ्यांकले देखाएको छ ।
स्रोत : अनलाईनखबर
Post a Comment
http://filmysangalo.blogspot.com/ कुनै मान्यता प्राप्त पत्रकार बाटसंचालित होईन | यो ब्लग बाट प्रकासित हुने सामाग्रीहरु नेपालको मान्यता प्राप्त पत्रपत्रिकाहरु र Youtube बाट प्रतिलिपि गरी Facebook मार्फत श्रोता सामुपुर्याउने सानो जमर्को मात्र गरेका हौ |
Note: Only a member of this blog may post a comment.