निगमको मासिक घाटा ४८ करोड रुपैयाँले बढ्ने अनुमान

भिडियो हेर्नको माथि को बक्स मा डबल क्लिक गर्नु होस्

१८ असार, काठमाडौं । नेपाल आयल निगमको मासिक घाटा ४८ करोड रुपैयाँ बढेर ७२ करोड ७१ ल्ााख रुपैयाँ पुग्ने प्रक्षेपण गरिएको छ । भारतीय आयल कर्पोरेशनले सोमबार पठाएको नयाँ मूल्यअनुसार निगमको मासिक घाटा अत्याधिक मात्रामा बढ्ने अनुमान गरिएको हो । यसअघि पठाएको मूल्यअनुसार निगमको मासिक घाटा २५ करोड रुपैयाँमात्र थियो ।

पछिल्लो समय अमेरिकी डलरको भाउ बढेपछि निगमको मासिक घाटा अकल्पनीय रुपमा बढेको निगमले बताएको छ । साथै, केही समय अगाडी ग्यास उद्योगी र बिक्रेतालाई गरिएको कमिशन वृद्धिले पनि निगमको मासिक घाटा बढ्न गएको हो । नयाँ मूल्यअनुसार निगमलाई खाना पकाउने ग्यासमा मासिक ६२ करोड ३९ लाख रुपैयाँ र डिजेलमा ४४ लाख ९६ हजार रुपैयाँ मासिक घाटा हुने अनुमान गरिएको छ । निगमलाई ग्यासमा प्रतिसिलिण्डर ४ सय ४५ रुपैयाँ ६७ पैसा घाटा हुनेछ । त्यस्तै, डिजेलमा प्रतिलिटर ६ रुपैयाँ ६१ पैसा घाटा खानुपर्ने छ ।

निगमलाई पेट्रोल, मट्टतिेल र हवाई इन्धनमा नाफा देखिएपनि उक्त नाफा घटेको छ । नयाँ मूल्यअनुसार निगमलाई पेट्रोलमा मासिक ५ करोड ३ लाख रुपैयाँमात्र नाफा हुने देखिएको छ । त्यस्तै, मट्टतिेलमा मासिक ३ करोड ४६ लाख रुपैयाँ र हवाई इन्धनमा मासिक २६ करोड १५ लाख रुपैयाँ नाफा हुने देखिएको छ । निगमलाई प्रतिलिटर पेट्रोलमा २ रुपैयाँ ८० पैसा, मट्टतिेलमा ११ रुपैयाँ ५४ पैसा, हवाई इन्धन आन्तरिक उडानतर्फ २२ रुपैयाँ ८४ पैसा, अन्तर्राष्ट्रिय उडानतर्फ २७ रुपैयाँ ५७ पैसा नाफा हुने अनुमान गरिएको छ ।