सबैभन्दा धेरै बजेट पाएको शिक्षाले माग्यो थप पाँच अर्ब

भिडियो हेर्नको माथि को बक्स मा डबल क्लिक गर्नु होस्

७ साउन, काठमाण्डौं । सरकारले चालू आर्थिक वर्षका लागि शिक्षामा विनियोजन गरेको रकम अपुग भएको शिक्षा मन्त्रालयले जनाएको छ । कुल बजेटको सबैभन्दा धेरै रकम शिक्षामा विनियोजन गरे पनि अपुग भएको भन्दै शिक्षाले अर्थ मन्त्रालयसँग थप पाँच अर्ब रूपैयाँ रकम माग गरेको हो । शिक्षाका लागि आवश्यक बजेट विनियोजन नहुँदा प्रारम्भिक बाल विकास केन्द्र, विद्यालय कर्मचारीलाई वृद्धि तलब उपलब्ध गराउन समस्या पर्नै शिक्षा मन्त्रालयका सहसचिव महाश्रम शर्माले बताए । शिक्षाका लागि सरकारले ८० अर्ब ९५ करोड ८० लाख ८० हजार रुपैयाँ बजेट चालू आर्थिक वर्षका लागि विनियोजन गरेको छ । यो रकम गत वर्षको बजेटको तुलनामा झन्डै १८ अर्ब बढी हो । गत वर्ष शिक्षाका लागि ६३ अर्ब ५२ करोड रुपैयाँ विनियोजन गरिएको थियो । शिक्षामा चालू आर्थिक वर्षका लागि शिक्षामा कुल बजेटको १६ प्रतिशत रकम हो । प्रारम्भिक बाल विकास केन्द्र, विद्यालय कर्मचारीलगायतका समस्या समधान गर्न करिब शिक्षाका लागि १० अर्ब आवश्यक पर्ने मन्त्रालयले जनाएको छ । शिक्षामा बजेट अपुगको विषयमा अर्थसचिव शान्तराज सुवेदीसँग छलफल भएको मन्त्रालयका प्रवक्तासमेत रहेका शर्माले बताए । अर्थ मन्त्रालयले कार्ययोजनासहित थप बजेटका लागि रकम पेस गर्न शिक्षा मन्त्रालयलाई निर्देशन दिएको राजधानी तथा नयाँ पत्रिकामा खबर छ । प्रारम्भिक बाल विकास केन्द्रमा पढाउने शिक्षिकाले २ हजार ४ सय र विद्यालयमा कार्यरत अधिकांश कर्मचारीले ६ हजार २ सय रुपैयाँ मासिक तलब खाँदै आएका छन् । चालू आर्थिक वर्षमा विनियोजित रकममा प्रारम्भिक बाल विकास केन्द्रकी शिक्षिका र विद्यालय कर्मचारीको तलब बढोत्तरी उल्लेख नभएका कारण बढाउन नसकिने मन्त्रालयले जनाएको छ । सरकारी कर्मचारीको कुल तलबमा १८ प्रतिशत वृद्धि गरिएको छ भने थप १ हजार रुपैयाँ उपलब्ध गराइनेछ । तर, वृद्धि भएको तलबअनुसार बाल विकास केन्द्रका शिक्षिका र विद्यालयमा कार्यरत कर्मचारीको तलब पुरानै कायम हुनेछ । मुलुकभर बाल विकास केन्द्रमा २९ हजार शिक्षिका छन् । त्यस्तै, देशभरका ७५ जिल्लाका १ सय ५० राम्रा विद्यालयलाई ५ लाख रुपैयाँ उपलब्ध गराइनेछ । सामुदायिक विद्यालयको शैक्षिक स्तरमा सुधार आउन नसकेको भन्दै सुधारका लागि जिल्लाका दुई एसएलसी परीक्षामा राम्रो नतिजा ल्याएका र अतिरिक्त क्रियाकलापमा अगाडि रहेका विद्यालयलाई ५ लाख रुपैयाँ उपलब्ध गराइने भएको हो ।