मनकामनाको खराब कर्जा नघटेपछि मर्जर अलपत्र

भिडियो हेर्नको माथि को बक्स मा डबल क्लिक गर्नु होस्

१९ असार, काठमाठडौं । इन्प|mास्ट्रक्चर डेभलपमेन्ट बैंक मनकामना विकास बैंकसँग मर्ज हुन तयार नभएपछि चार संस्थाबीच मर्ज हुने योजना अलपत्र परेको छ । मनकामना, आईडी, यती फाइनान्स र भ्याली फाइनान्सबीच मर्ज गर्ने समझदारी भएको थियो । मनकामनाको खराब कर्जा अनुपात उच्च भएको कारण आईडी बैंकले मर्ज नगर्ने निर्णय गरेको हो ।

मनकामना विकास बैंकले असारसम्म खराब कर्जा अनुपात घटाउने प्रतिवद्धता व्यक्त गरेपछि अन्य संस्था मर्जका लागि तयार भएका थिए । गत चैत्रको वित्तीय विवरणअनुसार मनकामनाको खराब कर्जा अनुपात १७.६६ प्रतिशत रहेको थियो । अहिलेसम्म उक्त खराब कर्जामा कुनै सुधार नआएपछि आईडी बैंक मर्ज नगर्ने निष्कर्षमा पुगेको हो ।

चारै संस्थाले मर्जरको निर्णय लिन हालै विशेष साधारणसभा गरेका थिए । आईडीको सभामा भने मत बाझिएपछि सञ्चालक समितिलाई निर्णय गर्ने जिम्मा दिइएको थियो । मर्ज गर्ने र नगर्ने विषयमा विभाजित सञ्चालक समिति अन्ततः मर्ज नगर्ने निर्णयमा पुगेको हो । डिडिए रिपोर्टपछि यती फाइनान्सको सेयर १० प्रतिशत बढी मूल्यांकन गर्ने र अरुको सेयर बराबर मूल्यांकन हुने गरी सहमति गरिएको थियो ।

आईडीले पहिले सहमति गरेर अन्तिममा धोका दिएको आरोप मनकामनाका प्रवर्द्धकले लगाएका छन् । आफूहरुले खराब कर्जा घट्ने आश्वासनको आधारमा मात्र सहमति गरेको हुनाले धोका दिएको भन्न नमिल्ने दाबी आईडीका प्रवर्द्धकले गरेका थिए । मनकामना बैंक प्रवर्द्धकले रामेश्वर थापाको नेतृत्वमा नयाँ विकास बैंकको सञ्चालक समिति चयन गर्ने प्रस्ताव गरेको थियो । वित्तीय अवस्था खराब भएको कारण थापाको पब्लिक फिगरले मात्र बैंक सुध्रन नसक्ने विश्लेषण अन्य संस्थाले गरेका छन् ।

नेपाल राष्ट्र बैंकका अधिकारीले भने मनकामनासँग मर्ज गर्न आईडीलाई दबाब दिएको बुझिएको छ । राष्ट्र बैंक स्रोतका अनुसार, समझदारी गरी डिडिएसमेत गरेपछि आईडी पछि हट्न उपयुक्त नहुने सुझाव राष्ट्र बैंक अधिकारीले दिएका हुन् । राष्ट्र बैंकमा रहेको मर्जर डेक्सले मर्जर पूर्व वित्तीय संस्थाका पदाधिकारीलाई बोलाएर इच्छा बुझ्ने, एकअर्का संस्थाका आन्तरिक कमीकमजोरी भएमा स्पष्ट पारिदिने र सबैको सहमति भएमा मात्र मर्जरका लागि प्रक्रिया अघि बढाउने गरेको छ ।