साग स्वर्णधारी आङबाबुलाई स्वर्ण

भिडियो हेर्नको माथि को बक्स मा डबल क्लिक गर्नु होस्

१५ असार, काठमाण्डौ । एघारौं दक्षिण एसियाली खेलकुद (साग) का स्वर्णधारी आङबाबु लामाले नवौं राष्ट्रिय उसु प्रतियोगितामा शनिबार स्वर्ण जितेका छन् । सिन्धुपाल्चोकका उनले थाउलुतर्फ पुरुषको थाइचीमा सबै प्रतिद्वन्द्वी भन्दा सर्वाधिक ९.६५ अंक जोड्दै स्वर्ण जितेका हुन् । ८.८० अंकमा मकवानपुरका हरिप्रसाद गोले दोश्रो तथा ७.६० अंकमा नवलपरासीका ध्रुवराज न्यौपाने तेश्रो भए ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको थाउलुतर्फ पुरुष नान छ्वानमा सशस्त्र प्रहरी बलको एपीएफ क्लबका सनी श्रेष्ठ पहिलो भए । उनले ८.७५ अंक प्राप्त गरे । काठमाडौंका विशाल थापा सिन्जाली (८.७०) दोश्रो र रुपन्देहीका सोमबहादुर मोक्तान (८.४५) तेश्रो भए । त्यसै स्पर्धाको महिलामा ८ अंक हासिल गर्दै काठमाडौंकी विद्या महर्जनले स्वर्ण जितिन् । कैलालीकी मनीषा राउत (७.१०) ले रजत र ललितपुरकी बन्दना कर्माचार्य (५.९०) ले कांस्य हात पारे ।

नेपाल उसु संघद्वारा आयोजित प्रतियोगिताको थाउलुतर्फ नै पुरुष छानछवान्मा ललितपुरका निराजन आले मगर पहिलो भए । उनले ९.०५ अंक जोडे । काठमाडौंका विजय सिन्जाली (८.८०) दोश्रो र दोलखाका रिन्जि शेर्पा (८.४५) तेश्रो भए । सोही स्पर्धाको महिलामा भक्तपुरकी सुस्मिता तामाङ शीर्ष स्थानमा रहिन् । सुस्मिताले ८.९५ अंक बटुलिन् । काठमाडौंकी ओसिन राई (७.४०) दोश्रो र नुवाकोटकी मिना घलान (७.२०) तेश्रो स्थानमा रहे । सान्सौंको पुरुष ४८ केजीमा उदयपुरका अशोक खालिङ र कैलालीका टेक श्रीमलले सेमिफाइनलमा प्रवेश गर्दै कम्तीमा कांस्य पदक पक्का गरेका छन् ।