कीर्तिमानी आरोही गौतम भन्छन्-सगरमाथा कालो पहाडजस्तो देखें

भिडियो हेर्नको माथि को बक्स मा डबल क्लिक गर्नु होस्

११ जेठ, काठमाडौं । दुवै हात नभएर पनि सगरमाथाको शिखरमा पुगेका कीर्तिमानी आरोही सुदर्शन गौतमले नेपालका हिम श्रृखलाहरु उच्च जोखिममा रहेको भन्दै जलवायु परिवर्तनको असर न्यूनीकरणका लागि काम गर्ने बताउनुभएको छ । जनसञ्चार अभियानमा शनिबार भएको अन्तरक्रियामा गौतमले आरोहणका क्रममा आफूले कालो पहाडको स्वरुपमा सगरमाथा देखेको भन्दै चिन्ता जनाउनुभयो । ‘सामान्यतयाः सगरमाथालाई सधैं हिउँले ढाकेको हुन्छ भन्ने ठानिन्छ’ गौतमले भन्नुभयो-’हिलारी स्टेपबाट हेर्दा सगरमाथा कालो पहाडजस्तो देखें ।’ जलवायु परिवर्तनको असरका कारण सगरमाथा हिउँविहीन भएको भन्दै उहाँले सगरमाथाको अस्तित्व गोजाउन लागि पर्नेमा जोड दिनुभयो । सगरमाथा आरोहण गरेर आफूले अपांगता हुँदैमा मानिसको इच्छाशक्ति मर्दैन भन्ने पुष्टि गर्न सकेकोमा गर्व लागेको गौतमले बताउनु भयो । आरोहण टोलीको नेतृत्व गरेका कीर्तिमानी आरोही पेम्बा दोर्जे शेर्पाले दुवै हात नभएर पनि सगरमाथाको सफल आरोहण गर्न सकेकामा गौतमको प्रसंशा गर्नुभयो । गौतमसहितको आरोहण टोलीले गत सोमबार सर्वोच्च शिखर सगरमाथाको सफल आरोहण गरेको थियो ।