हेलमेट अड्किएपछि प्रहरी महानिरीक्षक कुवेरसिंह राना

भिडियो हेर्नको माथि को बक्स मा डबल क्लिक गर्नु होस्

बुधबार बिहान ११ बजे एनसेलले प्रहरीलाई मोटरसाइकल र कम्प्युटर वितरण गर्दै थियो । कार्यक्रमको प्रमुख अतिथि प्रहरी महानिरीक्षक कुवेरसिंह राना थिए । कार्यक्रम प्रस्तोताले राना र काठमाडौं उपत्यका प्रहरी प्रमुख एआईजी नवराज ढकाललाई मञ्चभन्दा मुन्तिर राखेको बाइक स्टार्ट गर्न आग्रह गरे । बाइक चढ्नुअघि सुरक्षाको उपाय अपनाउनुपर्ने भन्दै हेलमेट लगाएर स्टार्ट गरे । टेलिभिजन दृश्यका लागि साइरन पनि बजाए । स्टार्ट गरे मात्र पुग्थ्यो तर आईजी रानाले गुडाउने इच्छा देखाए । उनले कार्यक्रम भएको सोल्टी होटलको मूलगेटबाट बाइक निकाल्न सकेनन् । त्यसपछि पछाडिपट्टकिो ढोकाबाट बाइक बाहिर निकाले । रानाको बायाँतर्फ प्रहरी उपरीक्षक जगतमान श्रेष्ठ र दायाँतर्फ प्रहरी नायब उपरीक्षक पवन गिरी बाइकमा थिए । ढोकाबाट ओर्लेर करिब २० मिटरजति चलाएपछि बाइक रोकेर स्टार्ट बन्द गरे । अनि हेलमेट खोल्ने प्रयास गरे । पटक-पटक खोल्न खोजे पनि सकेनन् । अनि सुरु भयो हेलमेट खोल्ने सिलसिला । पहिले प्रहरी उपरीक्षक धीरजप्रताप सिंहले प्रयास गरे । उनले पनि नसकेपछि जगतमान आए । यति गर्दा पनि नभएपछि अर्का एक डीएसपी आए । एकपछि अर्को प्रहरी अधिकारी थपिए पनि हेलमेटको लक धेरै बेर खुलेन । २०५२ सालमा डीएसपी हुँदा मोटरसाइकल चढे पनि त्यसपछि एकैचोटि बुधबार पहिलोपटक चढेको रानाले बताए । 'हेलमेटको लक खोल्ने अर्कै तरिका रहेछ । मलाई आएन । धेरैपछि बाइक चढेर होला कतै घुँडा ठोक्किने हो कि भन्ने डर पनि लाग्यो ।' जेहोस् धेरै बेरको प्रयासपछि लक खुल्यो र आईजी खुला भए ।