चन्दा माग्दै विद्यार्थी नेताको यस्तो धम्कि

भिडियो हेर्नको माथि को बक्स मा डबल क्लिक गर्नु होस्

काठमाडौं, जेष्ठ १२ - केही दिनअघि महाराजगन्जको मेरिडियन स्कुलका एकजना सञ्चालकलाई अखिल क्रान्तिकारीका विद्यार्थी नेता बताउने व्यक्तिले फोन गरेर स्ववियु निर्वाचनका लागि आर्थिक सहयोग मागे । आफूले पत्र छाडेको र झन्डै लाख रुपैयाँ 'सहयोग' गर्नुपर्ने बताएपछि सञ्चालक हच्किँदै त्यति ठूलो रकम सहयोग असम्भव रहेको बताए । फोन गर्नेले धम्की दिँदै भने, 'स्कुल बस, डेस्क बेञ्च र घरको त बिमा गर्नुभएको होला, पीर भएन, तपाईंको टाउको बिमा गरेको छैन होला नि ?' त्यही फोनले उनी अहिले तनावमा छन् । ललितपुर कुमारीपाटीको क्यास्पियन भ्याली कलेजमा शुक्रबार मध्याह्नसम्म सञ्चालक राजेन्द्र बरालको टेबुलमा विद्यार्थी संगठनले चन्दा मागेका सातवटा चिठी थिए । 'चिठीमा अनुरोधको भाषा लेखे पनि चन्दा माग्ने शैली जबर्जस्ती छ,' सञ्चालक बरालले कान्तिपुरसित भने, 'केन्द्रीय नेतासित कुरा गरेर कलेजको अवस्थाअनुसार स्वैच्छिक चन्दा दिने योजनामा छौं । आएजति सबैलाई चन्दा दिन सम्भव छैन/दिइँदैन ।' क्यास्पियनमा चन्दाका लागि केही दिनअघि क्रान्तिकारीकै नाममा धम्की आएको थियो । त्रिभुवन विश्वविद्यालयअन्तर्गतका क्याम्पसमा जेठ २३ गते हुन लागेको स्ववियु निर्वाचनका लागि विद्यार्थी संगठनले चन्दा संकलनमा सबै शक्ति परिचालन गरिरहेका छन् । अलि दिन सक्ने व्यक्तिहरूमा चन्दाको हैरानीमात्रै छैन आतंक नै छ । त्यसको सबैभन्दा बढी मारमा निजी शिक्षण संस्था, उद्योग/उद्योगी र क्याम्पस छेउका पसले छन् । चन्दा माग्न एमाओवादीको अखिल क्रान्तिकारी, एमालेको अनेरास्ववियु, कांग्रेसको नेविसंघ, वैद्य माओवादीको अखिल -क्रान्तिकारी) अगाडि छन् । नामै नसुनेका विद्यार्थी संगठन पनि चन्दाको चिठी काटिरहेका छन् । निजी शिक्षण संस्था हेरेर विद्यार्थी संगठनले ६ हजारदेखि ५० हजार रुपैयाँसम्म मागेको पीडितहरू बताउँछन् । नाम चलेका केही ठूला विद्यालयले ५० हजार रुपैयाँसम्म चन्दा दिने आश्वासन दिएका छन् । प्याब्सनका एकजना पदाधिकारीका अनुसार ठूला विद्यालयले धेरै चन्दा दिँदा त्यसको मार सानालाई परेको छ । चन्दा आतंक बढेको बताए पनि त्यसबारे खुलेर बताउन चाहने कमै छन् । ताहाचल क्याम्पस क्षेत्रमा स्टेसनरी सञ्चालन गर्दै आएका एक व्यापारीका अनुसार हरेक संगठनबाट कम्तीमा ५ हजार रुपैयाँ चन्दा माग्दै आएका छन् । दिन नसक्ने बताउँदा 'परेका बेला नसघाउने भए चलाउन मन छैन ?' भन्दै धम्क्याउने गरेको उनले सुनाए । स्ववियु चुनावमा हुने सम्पूर्ण खर्च विद्यार्थी संगठनले यस्तै चन्दाबाट संकलन गर्छन् । कति चन्दा संकलन भयो, हिसाब पारदर्शी भने हुने गरेको छैन । क्याम्पसको स्तर हेरेर एउटा संगठनले कम्तीमा ५० हजारदेखि ६ लाख रुपैयाँ सम्म चुनावी खर्च गर्छन् । यसबाहेक केन्द्रीय तहमा हुने खर्च कम्तीमा १२ देखि २० लाख रुपैयाँसम्मको छ । त्यसमा केन्द्रीय पदाधिकारीको यात्रादेखि चुनावको प्रचार सामग्री निर्माण र ढुवानीसम्म पर्छ । अखिल क्रान्तिकारीले केन्द्रमा कम्तीमा १२ लाख र कीर्तिपुरको केन्द्रीय वा आरआर जस्तो प्रतिष्ठा जोडिएको क्याम्पसमा कम्तीमा ४ लाख खर्च हुने अनुमान गरेको छ । 'सहयोग नउठाउनुको विकल्प छैन तर क्रान्तिकारीले कसैलाई धम्की दिएको छैन । धम्की दिनेको नम्बर उपलब्ध गराए हामी कारबाही गर्छौं,' क्रान्तिकारीका उपाध्यक्ष जागृत रायमाझीले भने, 'हामीले कसैलाई जबर्जस्ती गरेका छैनौं । केन्द्रीय कार्यालयबाट हिमाल शर्माले हस्ताक्षर गरेको मोबाइल नम्बरसहितको पत्र पठाइएको छ । त्यसबाहेक स्थानीय तहमा सम्बन्धित इञ्चार्जमार्फत आर्थिक संकलन भएको छ ।' स्ववियु चुनावका लागि संगठनका नाममा कोही व्यक्तिगत रूपमा चन्दा उठाउन आए नदिन उनले सुझाव दिए । त्रिविका ६० आंगिक र सम्बन्धनप्राप्त गरेर करिब ५ सय क्याम्पसमा स्ववियु निर्वाचन हुँदैछ । विद्यार्थी संगठनको शैली हेर्दा स्ववियु चुनावमा कुल डेढ करोड रुपैयाँभन्दा बढी खर्च हुने देखिन्छ । 'पैसा नभएर हामीले यसपालि पोस्टर नछाप्ने भयौं,' एमाले अखिलका अध्यक्ष माधव ढुंगेलले भने, 'पोस्टर छाप्न कम्तीमा २० लाख लाग्ने देखियो । यति ठूलो रकम संकलनको सम्भावना देखिएन । हामीसित पैसा छैन । हामी घोषणा पत्रबाहेक केही नछाप्ने भयौं ।' अखिलले पनि केन्द्रीय तहमा कम्तीमा १० लाख रुपैयाँ र क्याम्पसअनुसार ४० हजारदेखि ५ लाख रुपैयाँसम्म खर्च लाग्ने अनुमान गरेको छ । पार्टीका शुभेच्छुक, पूर्वनेता, व्यापारी तथा सम्पर्क मञ्च लगायतसित आर्थिक सहयोग लिने बेला यही भएकाले चन्दा स्वाभाविक भएको ढुंगेलले बताए । स्ववियु चुनाव अत्यन्त खर्चिलो र भडकिलो बन्दै गएको विद्यार्थी नेता पनि स्वीकार्छन् । नेकपा-माओवादीको अखिल (क्रान्तिकारी) ले चुनावी खर्च करिब ६० लाखको अनुमान गरेको बताए । 'तडकभडकभन्दा स्ववियु निर्वाचनलाई सभ्य बनाउन चाहेका छौं,' उनले भने, 'चन्दा माग्ने र धम्क्याउनेहरू बढेका छन् । आधिकारिक व्यक्तिसित नभेटी फोनकै आधारमा चन्दा नदिन हाम्रो अनुरोध छ । क्रान्तिकारीले कसैलाई धम्क्याएको छैन ।'