'ह्याप्पी न्यू इयर' मा शाहरुख-ऐश्वर्या १

भिडियो हेर्नको माथि को बक्स मा डबल क्लिक गर्नु होस्

मुम्बई , चैत्र २५ - अंग्रेजी क्यालेन्डरअनुसार त अझै नौ महिना बाँकी छ । बरु नेपाली पात्रोमा नयाँ वर्ष आउन एक हप्ता मात्रै बाँकी छ । तर शाहरुख खान र ऐश्वर्या राय बच्चनसँगै हुने भनिएको चाहिँ नयाँ फिल्म 'ह्याप्पी न्यू इयर' को हो ।

लभ स्टोरीका किङ शाहरुखको फिल्मी जोडीमा काजोलपछि ऐश्वर्या नै हिट मानिन्छिन् । 'देवदास' जोडीलाई यतिबेला कोरियोग्राफरबाट निर्देशनमा जम्दै गरेकी फराह खानले पुनः आफ्नो नयाँ फिल्ममा खेलाउनका लागि कम्मकर कसेर लागेकी हुन् । नायक अभिषेक बच्चनसँग विवाह गरेपछि फिल्म अभिनयबाट विस्तारै ओझेल पर्दै गएकी ऐशले गत वर्ष छोरी आरध्यालाई जन्म दिएपछि भने पूर्णतः घरमै सीमित रहिन् । तर अब भने उनले फिल्ममा कमब्याक गर्ने मनस्थिति बनाइरहेको खबर आइरहेका छन् ।

बढेको वजनलाई घटाएपछि मात्रै सार्वजनिक भएकी पूर्व विश्व सुन्दरीलाई 'ह्याप्पी न्यू इयर' बाटै कमब्याक गराउने तरखरमा फरहाले लिड रोलमा खेलाउन लागेकी शाहरुखको समेत सहयोग मागिरहेकी छन् । तर खेल्ने खबर भने अझै परिपक्व भइसकेको भने छैन । बरु सँगसँगै ऐशले निर्देशक श्रीराम राघवानको नाम नखुलाईएको फिल्मका लागि २५ वर्षीय वरुण धवनको अपोजिटमा खेल्न लागेको खबर पनि आएको छ । तर ऐश भने आफ्नो कमब्याकलाई सार्थक बनाउन ठूलो ब्यानर र गतिलो भूमिकाका लागि पर्खिरहेकी पनि बताइएको छ । यशराज फिल्मस्को हिट फिल्म 'मोहब्बते' मा समेत लभर जोडीको रूपमा बलियो उपस्थिति देखाइसकेकाले पनि ऐशका लागि शाहरुखको अपोजिटमा खेल्ने फराहको प्रस्ताव कमब्याकका लागि बढी सुरक्षित ठानिएको छ ।