एमाओवादीमा सुल्झिएन संगठनात्मक लफडा महराको संयोजकत्वमा कार्यदल, जनपरिचालनको घोषणा

भिडियो हेर्नको माथि को बक्स मा डबल क्लिक गर्नु होस्

१८ चैत, काठमाण्डौ । एकीकृत माओवादीले पार्टीमा देखिएको संगठनात्मक समस्या समाधानका लागि कार्यदल बनाएको छ । केन्द्रीय समिति र पदाधिकारीले पूर्णता पाउने अपेक्षा गरिएको बैठक डेढ महिनापछि जेठ १ गतेका लागि सरेको छ । आइतबारको बैठकमा २ सय ४० सदस्यीय केन्द्रीय समितिले पूर्णता पाउन नसकेपछि समस्या समाधानका लागि कार्यदल बनाइएको हो । ‘पार्टीभित्र देखिएका संगठनात्मक समस्याबारे अध्ययन गरी प्रतिवेदन पेश गर्न कार्यदल बनाइएको छ ।’- बैठकपछि केन्द्रीय सदस्य देवेन्द्र पौडेलले अनलाइनखबरसँग भन्नुभयो-’अब पार्टी एक महिनासम्म आन्तरिक प्रशिक्षण र जनपरिचालनमा होमिन्छ ।’ पार्टीभित्रको संगठनात्मक समस्या समाधानका लागि कृष्णबहादुर महराको संयोजकत्वमा गठित कार्यदलमा हिसिला यमी, गिरिराजमणि पोखरेल, देवेन्द्र पौडेल, जनार्दन शर्मा र रेखा शर्मा रहहेका छन् । त्यसैगरी द्वन्द्वकालीन मुद्दाको अध्ययन गरी प्रतिवेदन बुझाउने जिम्मा टोपबहादुर रायमाझीलाई दिइएको छ भने विगतमा नेत्रविक्रम चन्द विप्लवले हेर्दै आएको युवा परिचालनको जिम्मेवारी वर्षमान पुन अनन्तले पाएका छन् । पूर्व शिक्षामन्त्री दीनानाथ शर्मालाई पार्टी स्कुलिङ तथा बुद्धिजीवी फाँटको जिम्मेवारी दिइएको छ । पूर्वभूमिसुधार मन्त्री भीमप्रसाद गौतमले किसान फाँटको जिम्मेवारी पाएका छन् । रिक्त रहेका पदाधिकारी र केन्द्रीय सदस्य चयनका लागि उपाय खोज्न पाँच सदस्यीय कार्यदल गठन गरेको हो । पार्टी कार्यालय कोटेश्वर पेरिसडाँडामा आइतवार बसेको केन्द्रीय समितिको वैठकले यस्तै वैठक चैत २४ँ देखि बैशाख १८ गतेसम्म देशभर आमसभा र प्रशिक्षण गर्ने निर्णय गरेको छ । वैठकमा महाधिवेशन आयोजक समितिका सदस्यलाई पनि बोलाइएको थियो । गिरी र गुरुङ केन्द्रीय सदस्य एमाओवादी नेताका अनुसार आइतबारको बैठकमा २ सय ३६ जनाको सहभागिता थियो । पूर्व लडाकूसमेत रहेका यमबहादुर अधिकारी (प्रतिक्षा) र पदम लामा (सञ्जीव) समायोजनमा कर्णेल बन्न जाने भएकाले उनीहरु केन्द्रमा नरहने भएका छन् । संस्थापक सदस्य नरबहादुर कर्माचार्यलाई पनि संरक्षक बनाइएपछि उहाँको सीट पनि खाली भएको छ । उता महाधिवेशनको मुखैमा तराईको सशस्त्र समूह परित्याग गरी एमाओवादीका प्रवेश गरेका प्रल्हाद गिरी -पवन) आइतबार केन्द्रीय समितिको बैठकमा उपस्थित भएका छन् । उनलाई केन्द्रीय सदस्य बनाइएको स्रोतले बतायो । त्यस्तै वैद्य समूह छाडेर एमाओवादीमा फर्किएका कुमार दाहालकी धर्मपत्नी गीता गुरुङ्गलाई पनि आइतबारै केन्द्रीय समितिमा ल्याइएको छ । सल्लाहकार बनेका ३ जनालाई सम्झाइने महाधिवेशन आयोजक समितिमा रहेर पनि सल्लाहकार समितिमा सारिएका वेदनिधी अधिकारी, तेजप्रकाश कँडेल र धर्मचन्द्र लावतीसँग पार्टीले छलफल गर्ने भएको छ । नयाँलाई केन्द्रीय समितिमा ल्याउने तर उनीहरुलाई पन्साउने कार्यले अन्याय नहोस् भनेर छलफल गर्न लागिएको स्रोतले बतायो । जनपरिचालन र प्रशिक्षण अभियान आगामी चुनावलाई मध्यनजर गर्दै पार्टीले पाँचवटा शहरमा आमसभा, जनपरिचालन तथा राज्यस्तरीय प्रशिक्षण कार्यक्रम सञ्चालन गर्ने निर्णय गरेको छ । यो अभियान चैत्र २४ देखि बैसाख १८ सम्म सञ्चालन गरिने र जेठ १ गते अर्को बैठक बस्ने एमाओवादीले जनाएको छ ।