एमाओवादीको केन्द्रीय समिति घट्यो, विवाद घटेन नवप्रवेशीको बहुमत नबनाउन पुराना नेताको माग

भिडियो हेर्नको माथि को बक्स मा डबल क्लिक गर्नु होस्

१६ चैत, काठमाडौं । एकीकृत माओवादीले ३ सय ९९ सदस्यीय जम्बो केन्द्रीय समिति बनाउने निर्णय ३ दिन नबित्दै फिर्ता लिएको छ । केन्द्रीय समितिमा गरिएको निर्णय पदाधिकारी बैठकले ३ दिन नबित्दै बिहीबार उल्टाइदिएको हो । अब एमाओवादी केन्द्रीय समिति ३ सय ९९ सदस्यीय नभएर २ सय ४० जनाको मात्रै हुनेछ । तीन दिनअघि पार्टी मुख्यालय पेरिसडाँडामा बसेको केन्द्रीय समिति बैठकले १ सय ५१ सदस्य पूर्ण र २ सय ४८ वैकल्पिक रहेको ३ सय ९९ सदस्यीय केन्द्रीय समिति बनाउने निर्णय गरेको थियो । समितिका सदस्यहरुको गृहकार्य गरी शनिबार बस्ने बैठकले त्यसलाई अनितम रुप दिने बताइएको थियो । तर, विहीबार बिहानै बसेको बैठकले २ सय ४० सदस्यीय कमिटी बनाउने अर्को निर्णय गरेको छ । विगतमा महाधिवेशन आयोजक समितिमा २ सय ४० सदस्य थिए । तिनै सदस्यहरुलाई १ सय ५१ लाई पूर्ण सदस्यमा राखेर बाँकीलाई वैकल्पिक सदस्य बनाउने एमाओवादी नेताले बताएका छन् ।केन्द्रीय समिति ३ सय ९९ सदस्यीय बनाउने निर्णय भएपछि पार्टीमा ६ सय सदस्यले केन्द्रीय कमिटिमा दाबी गरेका थिए । मधेसीले ७५ जना, महिलाले ८० जना र दलित, जनजाति र पिछडिएको क्षेत्रबाटसमेत आकांक्षीको संख्या बढेपछि नेताहरुले विवाद मिलाउन नसकेको भन्दै समिति घटाउने निर्णय गरेको एक एमाओवादी नेताले अनलाइनखबरलाई बताए । विवाद यथावत् केन्द्रीय कमिटी सानो बनाउने पदाधिकारी बैठकले निर्णय गरे पनि कसलाई पूर्ण र कसलाई बैकल्पिक बनाउने भन्नेमा पार्टीभित्र विवाद यथावत रहेको छ । हेटौडा महाधिवेशनबाट चुनिएका ९८ मध्ये जनयुद्धपछि पार्टीमा लागेका ४५ भन्दा बढी सदस्य रहेको भन्दै जनयुद्धकालीन नेताहरुले युद्ध लडेर आएकालाई प्राथमिकता दिनुपर्ने र कमिटीमा उनीहरुको बहुमत हुनुपर्ने माग रहेका छन् । तर, पूर्व एकताकेन्द्रका नेताहरुले भने जनयुद्धकालीन र पछि आएका भनेर पार्टीमा भेदभाव हुन नहुने अडान राखेका छन् ।