संविधानसभा निर्वाचनामा सहयोग गर्ने भारतको प्रस्ताव

भिडियो हेर्नको माथि को बक्स मा डबल क्लिक गर्नु होस्

काठमाडौ, चैत्र १५ - भारत सरकारले संविधानसभा निर्वाचनका लागि प्राविधिक लगायत अन्य आवश्यक सहयोग गर्ने प्रस्ताव गरेको छ । भारतीय राजदूत जयन्तप्रसादले बिहीबार चुनावी मन्त्रिपरिषद्का अध्यक्ष खिलराज रेग्मीसंग भेटेर सहयोगको प्रस्ताव गरेको हो । भारत सरकार संविधानसभा निर्वाचनका लागि प्राविधिक लगायत अन्य सहयोग गर्न तयार रहेको भेटमा राजदूत प्रसादले प्रस्ताव गरेका मन्त्रिपरिषद् अध्यक्ष रेग्मीका प्रेस सहयोगी राजेन्द्र पाण्डेले ईकान्तिपुरलाई बताए । नयाँ सरकार गठन भएपछि सरकार प्रमुख रेग्मीसंग भारतीय राजदूतले पहिलो पटक भेटेको हो । सहयोग गर्ने भारतीय प्रस्तावको प्रत्युत्तरमा मन्त्रिपरिषद् अध्यक्ष रेग्मीले निर्वाचन आयोगका पदाधिकारीसंगको परामर्शपछि आवश्यक सहयोग लिन सकिने बताए । नेपालको संवैधानिक, राजनैतिक र कानुनी जटिलतालाई चिर्दै नयाँ सरकार गठन भएकोमा भारतीय राजदूत प्रसादले आफ्नो सरकारको तर्फबाट स्वागत गर्दै बधाई तथा शुभकामना व्यक्त गरेका थिए । नेपालको शान्ति र संविधान निर्माणको प्रक्रियामा भारत सदैव सकारात्मक रहेको प्रसादको भनाई रहेको पाण्डेले जानकारी दिए । पाण्डेका अनुसार लामो समयदेखि रही आएको दुई देशबीचको सम्बन्ध अझ दिगो हुनेमा दुवै तर्फबाट विश्वास व्यक्त गरियो । अध्यक्ष रेग्मीले भारत सरकारले दिएको बधाई तथा शुभकामनासंगै गरेको सहयोग प्रस्तावप्रति धन्यवाद व्यक्त गरेका थिए । यसैबीच सार्कका महासचिव अहमद सलिमले पनि मन्त्रिपरिषद् अध्यक्ष रेग्मीसंग भेटेका छन् ।