"फिल्म नचले पनि काम पाउँछु" भन्छिन सुमिना घिमिरे

भिडियो हेर्नको माथि को बक्स मा डबल क्लिक गर्नु होस्

सुमिना घिमिरेलाई अभिनयमा राम्रो सम्भावना बोकेकी नायिकाको रुपमा हेरिन्छ । पहिलो फिल्म 'दुलही' ले नै उत्कृष्ट नवनायिका विधामा चार अवार्ड दिलायो । ' छविलाल कञ्जुस छैन', 'किन मायामा', 'सडक', 'हेल्लो प्रकृति', 'तिम्रो लागि', 'माई ब्रदर' लगायतका फिल्म यिनका चार वर्षका उपलब्धि हुन् । पछिल्लो फिल्मा 'नाइन ओ क्लक' चैत १६ देखि नेपालव्पापी प्रदर्शनमा छ । यही फिल्मको पि्रमियर गर्न सुमिना पहिलोपटक हङकङ आएकी थिइन । 'दुलही' मा सीधासादा गाउँले केटीका भूमिकामा देखिनुभएकी 'नाइन ओ क्लक' मा यौनकर्मी बन्नुपर्दा अप्ठ्यारो लागेन ? यो फिल्मबारे धेरैजना कन्फ्युजमा छन् । पहिले 'ए सिक्स्टी नाइन' नाम राखिँदादेखि नै समस्या आएको थियो । कथामा केही परिवर्तन गरी 'नाइन ओ क्लक' बनाइएको हो । नराम्रा दृश्य केही छैनन् । त्यस्तो हुने भए म आफैं अभिनय गर्दिनथें नि । अहिलेका युवापिँढी क्षमताभन्दा ठूलो सपना देख्छन् । जसले गलत बाटोतर्फ डोर्‍याउन सक्छ । थोरै समयमा धेरै कमाइ मोजमस्तीमा रमाउने सपना देख्नेहरूलाई फिल्मले कुबाटोमा नलाग्न पोजेटिभ म्यासेज दिएको छ । फिल्ममा मैले साडी र कुर्ता सुरुवाल बाहेक पनि राम्रो गर्न सक्छु भन्ने जस्टिफाइ गरेकी छु । महत्त्वाकांक्षी यौनकर्मीको भूमिका गर्नुभएको छ, कथा वास्तविकतासँग कत्तिको मेल खान्छ ? यो हाम्रै समाजभित्रको कथा हो । मैले यसबाट निकै होप गरेकी छु । फिल्म हेरेपछि कसैले पनि पैसा कमाउन त्यस्तो गलत बाटो अपनाउनु हुन्न होला भन्ने लागेको छ । हङकङेली दर्शकको कस्तो प्रतिक्रिया पाउनुभयो ? सोचेको भन्दा धेरै राम्रो । थप ऊर्जा मिलेको छ । अहिलेका अधिकांश चलचित्रमा यौन प्राथमिकतामा पर्ने गरेको छ, यस्तो कहिलेसम्म चल्ला ? पहिलेका फिल्म पनि चलिरहेकै थिए । सेक्स ओरियन्टेड भयो भने एक दिन भए पनि चल्छ भन्ने मानसिकता छ । जुन चल्यो त्यही धारमा हिँड्ने प्रवृत्ति छ । यसैका कारण समेत पुराना निर्देशक कन्फ्युजमा हुनुभाको जस्तो लाग्छ । तर, चलचित्र बजारमा यस्तै फिल्म चल्छ भनेर ग्यारेन्टी दिन सकिँदैन । निर्माताहरू चलचित्रमा कम, हिरोइनमा बढी लगानी गर्छन् रे ? मैले अहिलेसम्म त्यस्तो भेटेकी छैन । यस क्षेत्रमा लागेर अहिलेसम्म केही गुमाउनुपरेको पनि छैन । बरु छोटो समयमै चर्चा पाएकामा गर्व लाग्छ । 'दुलही’ बाट चार-चारवटा अवार्ड पाउनुभयो, के यी विशुद्ध हुन् ? मेरो अवार्ड एकदम फेयर हो । मसँग कहाँ पैसा थियो र दिनु । मलाई निर्देशकले पहिले नै यो चलचित्रबाट अवार्ड पाउँछौ भन्नुभएको थियो । यसले अझ राम्रो काम गर्ने शक्ति दिएको छ । अझै आठ-दस वर्ष त म आफ्नो फिल्म नचले पनि काम पाउँछु । निर्माता/निर्देशकले रोज्जुपर्ने तपाईंमा त्यस्ता के-के खुबी छन् ? म सुटिङमा टाइममा पुग्छु । राम्रो काम गर्ने प्रयास गर्छु । सबैसँग घुलमिल हुन्छु । इमानदारीका साथ पूरा समय दिन्छु । एउटाको सुटिङ नसकी अर्को चलचित्रमा साइन गर्दिनँ । नयाँ प्रोजेक्ट ? क्रषिराज आचार्यको निर्देशनमा बन्ने फिल्म 'मिस्टेक' । पारिश्रमिकका मामिलामा नायिका बढी शोषित छन् रे ? पहिले हिरोका तुलनामा हिरोइनले निकै कम पाउँथे । तर अहिले त नायक/नायिकाको बराबरी जस्तै छ । पारिश्रमिक कति लिनुहुन्छ ? दुई लाखदेखि सवा दुई लाख । सधैं यत्ति नै भन्ने हुँदैन । कतिपय बेला रिलेसनको कुरा पनि हुन्छ । पहिलो चलचित्र 'छविलाल कञ्जुस छैन' मा ५१ हजार र 'दुलही' मा ७५ हजार लिएकी थिएँ । राजनीतिमा कत्तिको रुचि छ ? मेरी दिदी (साधना घिमिरे) पद्मकन्या क्याम्पसमा स्वतन्त्र विद्यार्थी युनियनकी कोषाध्यक्ष हुनुहुन्छ । यसैले पनि कहिलेकाहीँ हामीबीच राजनीतिक बहस चल्छन् । देशमा भइरहेका गतिविधिबारे जानकारी राख्छु । प्रेम सम्बन्ध कस्तो चल्दै छ ? सम्बन्ध जोडिएको दुई वर्ष जति भयो । राम्रै चलिरहेको छ । उहाँ व्यवसायमा संलग्न हुनुभएकाले भेट निकै कम हुन्छ । फेसबुक र च्याटमा समेत म निकै कम बस्ने भएकाले बढीजसो फोनमै कुरा हुन्छ । चलचित्र क्षेत्रमा 'सेक्रिफाइस’ शब्द निकै चल्तीमा छ । यो हल्ला मात्र हो कि सत्यता पनि छ ? मान्छे सबै एकनास हुँदैनन् । कसैले गलत गरेका पनि होलान् । तर मैले स्ट्रगल पिरियडदेखि अहिलेसम्म केही सेक्रिफाइस गर्नु परेको छैन । आफू राम्रो हुनुपर्दो रहेछ । यस्ता कुरा त फिल्म इन्डस्ट्रीबाहिर पनि हुन्छन् । तर हामी मिडिया नजिक रहेकाले बढी सुनिएका हुन् । दुई जनाको अन्डरस्ट्यान्डिङमा त जे पनि हुन सक्छ नि, होइन र ? परिवारका कुनै सदस्यले नअँगालेको यो पेसामा कसरी आउनुभो ? हाम्रो घर सुर्खेत हो, तर बुबाको जागिरका कारण ११ वर्ष दाङ बस्यौं । म सानैदेखि नाचगान भनेपछि हुरुक्कै हुने हुँदा स्कुलका कार्यक्रमहरूमा नियमित भाग लिन्थें । एसएलसीपछि काठमाडौं आएकी हुँ । नर्स बन्ने सपना थियो । ब्याचलर गर्दैगर्दा छुट्टीको समयमा नृत्य सिक्न पुगें । त्यहीबेला पहिलोपटक 'सिग्नेचर' मा अभिनयको प्रस्ताव आएको हो । तर त्यो फिल्म अहिलेसम्म रिलिज भएको छैन । हङकङ कस्तो लाग्यो ? साह्रै लोभलाग्दो ठाउँ रहेछ । जताततै झिलिमिली । हाम्रोमा लाइट छैन, यहाँका जनताले उज्यालो कम गर्न सरकारसमक्ष माग राखेको थाहा पाउँदा अचम्म लाग्यो । यताको लाइट हाम्रामा लैजान पाए कस्तो हुन्थ्यो होला है ? समय थोरै भएकाले यस पटक धेरै ठाउँ भने घुम्न पाइएन, तर पुनः आउनेछु ।