वैद्य माओवादी लुटपाटमा उत्रन थाल्यो निर्वाचन आयोगका कम्प्युटर रातारात लुटिए

भिडियो हेर्नको माथि को बक्स मा डबल क्लिक गर्नु होस्

१४ चैत, काठमाडौं । खिलराज रेग्मी नेतृत्वमा चुनावी सरकार गठन भएलगत्तै निर्वाचन आयोगले फोटोसहितको मतदाता नामावली अद्यावधिक गर्ने कार्यलाई तीब्रता दिएको छ ।

तर, निर्वाचन आयोगको यो अभियानलाई चुनौती दिँदै वैद्य पक्षीय माओवादी कार्यकर्ताहरु छापामार शैलीमा लुटपाटमा उत्रिन थालेका छन् । मंगलबार राति नुवाकोटमा आयोगका ल्यापटप र अन्य सामाग्रीहरु माओवादीबाट लुटिएका छन् ।

निर्वाचन आयोगले पूर्णता पाएपछि चुनाबी तयारीका कामले तीव्रता पाएको छ । मुख्य राजनीतिक दलहरु चुनावको रणनीतिमा लागेका छन् । दलहरुको गतिबिधिबाट वाक्क भएका जनता पनि चुनाव भएमा राजनीतिक स्थिरता हुन्छ कि भन्ने आशले मतदानको ‘मूड’ बनाउन थालेका छन् । तर, नेकपा-माओवादी लगायतका केही दल भने चुनावको बिरोधमा मात्र होइन, वर्तमान सरकारले गर्ने चुनावै बिथोल्ने रणनीतिमा लागेका हुन् ।

मंगलबार राति निर्वाचन आयोगको कार्यालय नुवाकोटबाट चतुराले गाँउ विकास समितिमा खटिएको फोटोसहितको मतदाता नामावली सङ्कलक टोलीका सामान लुटिएको छ । रातिको समयमा चारजनाको समूहमा नकाब र हातमा लाठी लिएर आएका व्यक्तिहरूले आफूहरू नेकपा-माओवादीको कार्यकर्ता भन्दै निर्वाचनसँग सम्बन्धित सामग्रीहरू लुटेर लगेका हुन् । मतदाता नामावली सङ्कलनको तीन दिने कार्यक्रमअन्तर्गत मंगलबार पहिलो दिन आठजनाको नाम सङ्कलन गरी चतुराले गाविसको वडा नम्बर १ स्थित मङ्गलदाश श्रेष्ठको घरमा सुत्न लागेका समयमा ल्यापटप, किबोर्ड, चार्जर, वेभ क्यामरा, फिङ्गर पि्रन्ट र निर्वाचनसँग सम्बन्धित कागजात लुटेर लगेको कम्प्युटर अप्रेटर रिना अर्यालले सञ्चार माध्यमलाई दिनुभयो ।

नामावलीमा छुटेका मतदातालाई समेट्न आयोगले चैत १ गतेदेखि घरदैलो अभियान थालेलगत्तै माओवादी र लिम्बुवान यसको बिरोधमा छन् । पाँचथर, ताप्लेजुङ्ग, भोजपुर, संखुवासभा, पाल्पा, सुर्खेत, रोल्पा, बाग्लुङ्ग, नुवाकोट, म्याग्दीलगायतका जिल्लामा पुगेका निर्वाचन टोलीका ल्यापटप, मतदाता अनुसूचि फारमलगायतका सामग्री खोसेका छन् । मतदाता नामावली संकलनमा अवरोध हुन थालेपछि गृहमन्त्रालयले चुनावको वातावरण बनाउन सम्बन्धित पक्षसित आग्रह गर्दै अवरोध गर्नेलाई कार्वाही गर्न स्थानीय प्रशासनलाई निर्देशन दिएको छ । तर, गृहले निर्देशन दिएको तीन दिन भैसक्दा समेत अवरोध रोकिएको छैन । अवरोध गर्नेलाई कार्वाही पनि भएको छैन । बरु उल्टै वैद्यपक्षका कार्यकर्ताले निर्वाचन आयोगका सामाग्रीसमेत लुट्न थालेका छन् ।

नामावली संकलनमा सहयोग गर्न आयोगको आग्रह

अहिले चुनावको मितिबारे टुंगो नभए पनि छुटेकाहरुको मतदाता नामावली संकलन गर्ने योजना आयोगले पहिलेदेखि नै बनाएको हो । ‘फोटोसहितको मतदाता नामावली संकलनमा छुटेकाको विवरण लिने र अद्यावधिक गर्ने काम हाम्रो नियमित कार्य हो’ आयोगका प्रवक्ता अनिलकुमार ठाकुरले भन्नुभयो । मतदाता सूचीमा नाम लेखाउन छुटेमा त्यो मतदान गर्ने अधिकार त हनन् हुन्छ नै । अहिले तयार पारिने सूचीकै आधारमा राष्ट्रिय परिचय पत्र बनाउने सरकारी योजना रहेकाले अर्को काममा पनि धक्का पुग्छ । पछि त्यहि परिचयपत्रका आधारमा सामाजिक सुरक्षा भत्ता लिने लगायतका सुविधा दिने सरकारको तयारी छ । त्यसैले जनताको अधिकार बञ्चित हुने काम नगर्न आयोगले सम्बन्धित सबै पक्षसित आग्रह गरेको छ ।

मतदाता नामावली संकलनमा अवरोध गर्ने नेकपा माओवादी भने आयोग र सरकारसँग भन्दा पनि मुख्य चार राजनीतिक दलसित रीस फेर्ने रणनीतिमा छ । फागुन ३० गते मुख्य दलहरुबीच भएको सहमति अर्थात रेग्मी नेतृत्वमा गठन भएको सरकार खारेज हुनुपर्ने उसको माग छ । ‘हामी जनताको अधिकार बिरुद्धमा होइन, गैरराजनीतिक व्यक्तिको नेतृत्वमा सरकार गठन गर्ने प्रतिगमन बिरुद्ध आन्दोलनमा छौं’- नेकपा माओवादी प्रवक्ता पम्फा भुसाालले भन्नुभयो-’वर्तमान सरकार खारेज गरेर दलहरुको सहमतिमा नयाँ सरकार गठन नहुँदासम्म चुनाव हुन दिन्नौं ।’

सरकारले गृहमार्फत् कानूनी कारवाही गर्ने वक्तव्य निकालेर आफ्नो दायित्व पूरा भएको सम्झिएको छ । तर, कांग्रेस सभापतिले सुशील कोइरालाले पोखरामा आयोजित पत्रकार सम्मेलनमा आफूहरुले चुनावको वातावरण बनाउनका लागि वैद्यपक्षसँग पनि कुराकानी गर्ने बताउनुभएको छ । वैद्यका कार्यकर्ताहरु भने सरकारी चेतावनीको वेवास्ता गर्दै निर्वाचन आयोगका भातिक सामाग्रीसमेत कब्जा गर्ने अभियानमा लागेका छन् ।