१४ दिनको न्यायिक हिरासतमा आशाराम

भिडियो हेर्नको माथि को बक्स मा डबल क्लिक गर्नु होस्

काठमाडौ, भाद्र १८ - जोधपुर (एजेन्सीहरू) नाबालिग बलात्कारको आरोपमा पक्राउ परेका भारतीय धर्मगुरु आशाराम बापुलाई भारतको राजस्थान राज्यको जोधपुर अदालतले सोमबार १४ दिनको न्यायिक हिरासतमा पठाएको छ । उनलाई शनिबार अबेर राति मध्यप्रदेशका इन्दौरस्थित आश्रमबाट पक्राउ गरेपछि प्रहरीले सोधपुछका लागि एक दिनको मात्र म्याद पाएको थियो । उनलाई आइतबार बिहान मुख्य घटनास्थल जोधपुर ल्याइएको थियो । थुना म्याद समाप्त हुन केही घन्टा अगावै प्रहरीले उनलाई सोमबार बेलुकी अदालतमा उपस्थित गराएको थियो । अदालतले उनलाई जोधपुर सेन्ट्रल जेलमा १५ सेप्टेम्बरसम्म राख्ने आदेश दिएको छ । बिरामी भएको बहाना गर्दै दुई सातादेखि प्रहरीसँग लुकामारी खेल्दै आएको अर्बपति बाबा आशाराम चिकित्सकीय जाँचमा पूर्णतः स्वस्थ छन् । उनले जमानतका लागि गरेको अपिलमा मंगलबार बहस हुनेछ । प्रहरीले आफ्नो सोधपुछ पूरा भएको जनाएको छ । यौन शोषणमा सक्रिय सहयोग पुर्‍याउने आशारामका फरार सहयोगीहरू शिबा र शिल्पीको प्रहरीले खोजी गरिरहेको छ । महँगो र चम्किलो कार एवं भव्य आश्रममा बस्ने आशाराम पहिलोपटक प्रहरी खोरको अनुभव गरिरहेका छन् । बलात्कार भएको ठोस आधार जुटाउन प्रहरीले आइतबार एक चिकित्सकीय टोलीको सहयोगले आशारामको पुरुषत्वको जाँच गराएको थियो, जसमा उनी स्वस्थ देखिएका छन् । उनको यौनशक्तिमा कुनै कमी नरहेको जाँचमा पाइएको छ । चिकित्सकीय जाँचमा किशोरीसँग यौन शोषण भएको पहिला नै पुष्टि भइसकेको छ । आश्रममा आइतबार राति आशाराम र उनको कर्मचारीलाई आमनेसामने राखेर प्रहरीले सोधपुछ गरेको थियो । उनले त्यो किशोरीसँगै एक घन्टा एकान्तमा बिताएको स्वीकारे पनि बलात्कारको आरोपको खण्डन गरेका छन् । आशारामले लगातार झूट बोलेर मूर्ख बनाउन खोजेको प्रहरीले जनाएको छ । उनलाई पक्राउ गरिएपछि पीडित किशोरीले खुसी प्रकट गर्दै ईश्वरलाई धन्यवाद दिएको परिवारजनले बताएका छन् । सञ्चारमाध्यमको सहयोगले मात्र यो सम्भव भएको पीडितका पिताले बताए ।