एक पेशा चार वर्षपछि लागू हुने

भिडियो हेर्नको माथि को बक्स मा डबल क्लिक गर्नु होस्

२२ असार, काठमाडौं । दर्तावाल लेखापरीक्षकको संगठन अडानले आन्दोलन चर्काएपछि लेखा व्यवसायीको नियामक आइक्यानले एक व्यक्ति एक पेशाको व्यवस्था पूर्णत लागू गर्ने मिति चार वर्ष पछि सार्ने निर्णय गरेको छ । नेपाल चार्टर्ड एकाउन्टेन्ट्स नियमावलीमा यही साउन १ मा त्यस्तो व्यवस्था लागू हुने उल्लेख छ ।

दर्तावाल लेखापरीक्षकले यो व्यवस्थालाई पछि सार्न माग गर्दै आन्दोलन गरिरहेका थिए । चार्टर्ड एकाउन्टेन्टको संघ एक्यान र सीए विद्यार्थीहरुको संगठनले नियमावलीको व्यवस्था लागू हुनुपर्ने माग राख्दै आन्दोलन गरेका थिए । दुईतर्फी दबाबको कारण निर्णय लिन नसकेको आइक्यान परिषदले तेस्रो पटकको बैठकमा शुक्रबार उक्त निर्णय गरेको हो ।

परिषद्को निर्णयअनुसार, यो साउन १ गते ५ करोड रुपैयाँभन्दा बढी कारोबार गर्ने सहकारी संस्था र दुई करोड रुपैयाँभन्दा बढी कारोबार गर्ने निजी कम्पनीमा मात्र एक व्यक्ति एक पेशा लागू हुनेछ । क्रमशः दायरा फराकिलो पार्दै २०७४ साउनदेखि मात्र पूर्ण लागू हुने सहमति गरिएको छ । नियमावलीअनुसार सीएको हकमा दुई वर्षअघि एक पेशा पूर्णतः लागू भइसकेको छ ।

लेखा व्यवसायलाई अन्तर्राष्ट्रिय मापदण्डअनुरुप बनाउन आइफ्याकसँग नेपालले गरेको प्रतिवद्धता पूरा गर्न एक पेशाको व्यवस्था लागू गरिएको हो । तर दर्तावाल लेखापरीक्षकले विरोध गरेपछि यसलाई केही समय पछि सारिएको छ । आइक्यानको सिफारिशमा अर्थ मन्त्रालयले नियमावलीमा परिवर्तन गरेपछि नयाँ व्यवस्था लागू हुनेछ । दर्तावाल लेखापरीक्षकमा सरकारी कर्मचारीको संख्या उल्लेख्य रहेको छ ।