एकपछि अर्को मागप्रति व्यवसायी उन्मुख कमिसन बढाएको एक महिना नबित्दै फेरि ग्यास आन्दोलन

भिडियो हेर्नको माथि को बक्स मा डबल क्लिक गर्नु होस्

काठमाडौ, असार १७ - सुन र पानी व्यवसायीले आफ्ना जायज/नाजायज माग पूरा गर्न सरकारलाई घुँडा टेकाएलगत्तै ग्यास व्यवसायी पनि यस्तै आन्दोलनमा लागेका छन् । ग्यास विक्रेताले कारोबार ठप्प पार्नेसम्मको आन्दोलन शनिबार साँझ घोषणा गरेका हुन् । 'ग्यास ठप्पै पार्नेसम्मको आन्दोलन गर्ने निर्णय छ,' महासंघका महासचिव महेश्वर श्रेष्ठले भने । सरोकारवालाहरूले चुनावी म्यान्डेट मात्र भएको कमजोर सरकार रहेका बेला 'धमिलो पानीमा माछा मार्ने' उद्देश्यबाट ग्यास ठप्प पार्ने निर्णय गरेको प्रतिक्रिया दिएका छन् । उनीहरूले विक्रेता यो निर्णय उपभोक्ता विरोधी भएको बताएका छन् । विक्रेताले शनिबार ग्यास विक्रेता संघका अध्यक्ष चन्द्र थापाको संयोजकत्वमा २१ सदस्यीय संघर्ष समिति गठन गरेका हुन् । सरकार र सरोकारवाला पक्षसँग वार्ता तथा समन्वय गर्न महासंघका अध्यक्ष ज्ञानेश्वर अर्यालको संयोजकत्वमा ५ सदस्यीय 'स्टेरिङ कमिटी' गठन गरिएको छ । संघर्ष समितिलाई आवश्यक निर्देशन र परिचालनसमेत गर्ने स्टेरिङ कमिटीको सदस्यमा ग्यास विक्रेता संघका अध्यक्ष विवेन्द्रभक्त प्रधानांग, ग्यास वितरक संघका अध्यक्ष चन्द्रकृष्ण श्रेष्ठ, महासंघको पूर्वाञ्चल सदस्य वीरेन्द्र कार्की र पश्चिमाञ्चल सदस्य सहदेव श्रेष्ठ छन् । सरकारले कुनै दबाब र संघर्षको कार्यक्रमबिनै कमिसन ४ रुपैयाँ बढाइदिए लगत्तै विक्रेताले आन्दोलन गर्ने निर्णय गरेका हुन् । कमिसन वृद्धिअघि विक्रेताले आन्दोलनको निर्णय गरेका थिएनन् । ग्यास प्लान्ट सञ्चालकले भने कमिसन र सञ्चालन खर्च वृद्धिका लागि आन्दोलनको घोषणा गरेको थियो । कमजोर सरकार रहेका बेला आफ्ना नाजायज माग पूरा गराउन बिक्रेताले आन्दोलनको घोषणा गरेको उपभोक्ता अधिकारकर्मीले बताएका छन् । 'ग्यास उद्योगी, पानी व्यापारी र दूध व्यापारीले सरकारलाई घुँडा टेकाए,' उपभोक्ता अधिकार अनुसन्धान मञ्चका अध्यक्ष माधव तिमिल्सिनाले भने, 'त्यसैबाट सिकेर ग्यास विक्रेताले पनि आन्दोलनको घोषणा गरेका हुन् । कमजोर सरकार रहेका बेला आफ्ना नाजायज माग पूरा गराउन बन्द हडताल गर्ने परिपाटी गलत हो ।' सरकारले ५ प्रतिशत कमिसन वृद्धि गरे ग्यास विक्रेताले प्रतिसिलिन्डर ग्यासमा ७३ रुपैयाँ ५० पैसा कमिसन पाउँछन् । पछिल्लो पटकको वृद्धिले विक्रेताको कमिसन ३२ रुपैयाँ पुगेको छ । 'म मासिक ३ सय सिलिन्डर बेचेर ९ हजार रुपैयाँ कमाउँछु,' महासचिव श्रेष्ठले भने, 'यति पैसाले कसरी गुजारा चल्छ ?' अध्यक्ष तिमिल्सिनाले भने कमिसन नपुगेर आजसम्म कुनै ग्यास विक्रेता पेसाबाट विस्थापित हुनु नपरेको बताए । 'गुजारा चल्दैन भने ग्यास पसल खोलिन किन नरोकिएको ? भएका ग्यास पसल किन बन्द नभएको ?' उनले प्रश्न गर्दै भने, 'यो सबै नौटंकी हो ।' तिमिल्सिनाले आवश्यकताभन्दा बढी ग्यास विक्रेता हुनु समस्या भएको बताए । काठमाडौं उपत्यकामा कम्तीमा ४ हजारसहित देशभर करिब २० हजार ग्यास विक्रेता भएको महासंघको अनुमान छ । विक्रेताको संख्या बढ्दा मुनाफा पनि बाँड्नुपर्ने हुन्छ । 'अभावका बेला उपभोक्तालाई नयाँ सिलिन्डर भिडाउने, कालाबजारी गर्ने, चामल/चिया र पान पसलबाट समेत ग्यास बेच्ने विक्रेताले अहिले कमिसनको मात्र कुरा उठाउन मिल्छ ?' तिमिल्सिनाले भने ।