प्रचण्ड चीन जाँदै, फर्कनासाथ दिल्ली चीन या भारततिर ढल्कने नीति असफल

भिडियो हेर्नको माथि को बक्स मा डबल क्लिक गर्नु होस्

 एकीकृत नेकपा माओवादी अध्यक्ष पुष्पकमल दाहाल प्रचण्ड आगामी वैशाख १ गते नयाँ वर्ष पारेर चीन भ्रमणमा जानुहुने भएको छ । चीनबाट फर्केलगत्तै उहाँ भारत जानुहुनेछ ।

चिनियाँ कम्युनिष्ट पार्टीको निमन्त्रणमा प्रचण्डसहितका नेताहरु चीन जान लागेका हुन् । ‘अध्यक्षसहितको सानो टोली वैशाख १ गतेबाट चीन भ्रमणमा जाने तय भएको छ ।’-नेता हरिबोल गजुरेलले अनलाइनखबरसँग भन्नुभयो-’भ्रमणका क्रममा उच्चस्तरीय भेटवार्ता हुनेछ ।’ उहाँका अनुसार भ्रमणका क्रममा प्रचण्डले नयाँ चिनियाँ राष्ट्रपति सी जिनपिङसहितका उच्च नेताहरुसँग भेटवार्ता गर्नु हुनेछ ।

प्रधानमन्त्रीबाट राजीनामा दिएलगत्तै प्रचण्डले मोहनवैद्य र कृष्णबहादुर महरा समेतलाई लिएर बेइजिङ भ्रमण गुर्नभएको थियो । तत्कालीन राष्ट्रपति हु जिन्ताओसँग भेट गरेर फर्कने क्रममा प्रचण्डले त्रिभुवन विमानस्थलमा पत्रकारसँग कुरा गर्दै एशियाले विश्वको नेतृत्व गर्ने बताउनुभएको थियो ।

एमाओवादी नेतालाई तत्कालीन चिनियाँ अधिकारीहरुले भारतसँग नेपालले मिलेर अघि बढ्नुपर्ने सल्लाह दिएका थिए । तर, चीनबाट फर्केको केही दिनमै प्रचण्डले नयाँ बानेश्वरमा भाषण गर्दै माधव नेपाल सरकार कठपुतली भएकाले सोझै दिल्लीसँग वार्ता गर्ने बताउनुभएको थियो । दक्षिणी छिमेकीसँग सम्बन्ध सुधार्ने सल्लाह लिएर चीनबाट फर्केका एमाओवादी नेताले भारतीय सीमानामा प्रदर्शन गर्ने अभियानसमेत चलाएका थिए, जसले गर्दा प्रचण्ड र दिल्लीको सम्बन्ध झनै चिसिएको थियो । तर, अब हुने भारत भ्रमणपछि यो सम्बन्धमा सुधार आउने एमाओवादी नेताहरुको विश्वास छ ।

भारतको आलोचना गरेर चीनलाई खुशी तुल्याउने प्रचण्डको रणनीतिलाई बेइजिङले चार वर्षअघि नै अस्वीकार गरिसकेको छ । नेपालका लागि पूर्वचिनियाँ राजदूत याङ होउलानले यसअघि नै भनिसकेका छन् कि नेपाललाई हेर्ने मामिलामा भारत र चीनको साझा धारणा छ । यसले पनि स्पष्ट पार्छ, आपसी सम्बन्ध सुधार्ने अभियानमा लागेका दिल्ली र बेइजिङमध्ये उत्तरतर्फमात्रै ढल्किने नीतिबारे एमाओवादीले पुनर्विचार गर्नुपर्ने महसुस गरेकै हुनुपर्छ ।

चीनबाट फर्कनासाथ भारत

दुबे छिमेकीसँग सन्तुलन कायम गर्ने उद्देश्यअनुरुप चीनबाट फर्किएलगत्तै प्रचण्डले भारतको समेत भ्रमण गर्ने कार्यक्रम तय भएको एमाओवादी उच्च स्रोतले अनलाइनखबरलाई बतायो । । ‘भारतबाट पनि निम्तो आएको छ’ एमाओवादी नेता गजुरेलले भन्नुभयो-’चीनबाट फर्किएलगतै भारत जाने कुरा छ ।’ प्रधानमन्त्री भएका बेला भारत गएयता ०६५ सालदेखि प्रचण्डले दिल्ली भ्रमण गर्नुभएको छैन ।

एमाले महासचिव भारत प्रस्थान

यसैबीच नेकपा एमालेका महासचिव ईश्वर पोखरेल भारत भ्रमणका लागि सोमबार कोलकाता प्रस्थान गर्नुभएको छ । भारतीय कम्युनिष्ट पार्टीको नवौं महाधिवेशनमा सहभागी हुन उहाँ त्यसतर्फ जानुभएको हो ।

महासचिव पोखरेलका साथमा पार्टीका विदेश विभाग सचिव केशव पाण्डेसमेत हुनुहुन्छ । नेताद्वय बिहीबार स्वदेश र्फकने कार्यक्रम रहेको एमालेले जनाएको छ ।