अजय देवगनले 'गोल्डन केला अवार्ड' पाए

भिडियो हेर्नको माथि को बक्स मा डबल क्लिक गर्नु होस्

यो हप्ता अजय देवगनले 'गोल्डन केला अवार्ड' पाएछन् । वर्षभरिका सबभन्दा रद्दी फिल्म र कलाकारलाई दिइने यो अवार्डबाट पहिलोपटक अजय 'सम्मानित' भएका हुन् । केही वर्ष पहिलेसम्म यस्तो थिएन । बक्स अफिसमा 'ए' ग्रेडको बिकाउ स्टार नभए पनि अजय अवार्डको मञ्चमा अरूभन्दा अग्ला देखिन्थे । फिल्मफेयरजस्ता कमर्सियल अवार्ड मात्र होइन, नेसनल अवार्ड, स्क्रिन अवार्ड र बंगाल क्रिटिक एसोसिएसनका अवार्डमा पनि उनको वचस्र्व रहन्थ्यो । गोविन्द निहालानी, मणि रत्नम, राजकुमार सन्तोषी, प्रकाश झा, ऋतुपर्णो घोषजस्ता निर्देशकका फिल्मका हिरो अजय अचेल भने साजिद खान र रोहित सेट्टीका हिरो भएका छन् । अभिनयमा विविधता भएका तिनै अजयले अहिले गोल्डेन केला पाउँदा एउटा पुरानै कुराको याद भयो । कला र पैसाको सम्बन्धको । जुन बेला अजय सबभन्दा राम्रा निर्देशकको फिल्म खेल्थे, बक्स अफिसमा उनको भाउ थिएन । तर, जब उनी केही बकबास फिल्महरूको मद्दतले सय करोड क्लबका स्थायी सदस्य भए, निजी जहाजै किन्न पुग्ने पैसा कमाए, उनको गणना झुर अभिनेतामा हुनथाल्यो । र, उनले गोल्डेन केला पाए । यो समाचारसँगै दिमागमा एउटा 'आइडिया' आयो । यस्तै 'सुनौलो केरा' अवार्ड हामीले पनि गर्ने हो कि ? यदि गर्ने हो भने त्यो फिल्मी अवार्ड हुनु हुँदैन । हाम्रो फिल्ममा राम्रो काम गर्नेले नै अवार्ड पाउन सकेका छैनन् भने नराम्राको कसलाई मतलब । बरु यो केराको झटारो राजनीति, उद्योग व्यापार र समाजका अरू क्षेत्रतिर पो हान्ने हो कि ? जसले देशलाई यति 'सुनौलो' बनाउन योगदान गरेका छन् । आफ्नो सत्ता न्यायाधीशलाई सुम्पेर 'श्रीमान् श्रीमान्' भन्दै हिँडेका नेताहरूमध्ये 'बेस्ट नेता'को अवार्डका लागि मुख्य प्रतिस्पर्धी को को हुन्थे होलान् ? कि वैद्य बाले भनेजस्तो 'चार दलीय सिन्डिकेट'का साना ठूला सबै नेतालाई एकैपटक 'गोल्डेन केला' दिए बेस होला ?