एपीएफमाथि थ्रीस्टार क्लबको संघर्षपूर्ण जित एपीएफ २-१ ले पराजित

भिडियो हेर्नको माथि को बक्स मा डबल क्लिक गर्नु होस्

७ फागुन, काठमाडौँ ।  राजधानीमा जारी सहिद स्मारक ए डिभिजन लिग फुटबलको सुपर सिक्समा डिफेन्डिङ च्याम्पिएन थ्रीस्टार क्लबले  सशस्त्र प्रहरीको एपीएफ क्लबलार्इ पराजित गरेको छ । बुधवार त्रिपुरेश्वरस्थित दशरथ रंगशालामा भएको खेलमा सशस्त्र प्रहरीको एपीएफ क्लबमाथि २-१ को कठिन जित दर्ता गर्दै लिग एक दिनका लागि भएपनि  तालिकाको दोस्रो स्थानमा उक्लिएको हो । खेलको २२ औँ मिनेटमा कप्तान सन्तोष साहुखलले गोल गर्दै थ्रीस्टारलाई सुरुवाती अग्रता दिलाए ।

तर त्यो अग्रता आधा घण्टा पनि टिकाउन थ्रीस्टार असफल रह्यो । खेलको ५३ औँ मिनेटमा एपीएफका भेट्रान स्ट्राइकर गणेश लावतीले गोल गर्दै खेल १-१ को बराबरीमा ल्याए । उपाधि होड कायमै राख्न एपीएफ विरुद्ध जित निकाल्नै पर्ने दबाबमा रहेको थ्रीस्टारले दोस्रो हाफमा गोल खाएपछि केही आक्रामण खेल प्रस्तुत गरेको थियो ।

अतिरित्त समयको ९२ औँ मिनेटमा निराजन खड्काले गोल गर्दै थ्रीस्टारलाई पुनः अग्रता दिलाए । त्यसपछि बाँकी समयमा दुवै टोलीबाट गोल हुन सकेन र खेल थ्रीस्टारले २-१ ले जित्यो । खेलमा दुबै टोलीले गोल गर्ने केही मौका गुमाएका थिए ।

जितपछि थि्रस्टारले शिर्ष स्थानमा रहेको मनाङमर्स्याङदी क्लबसँग अंक दूरी छोट्याएको छ । जितसँगै २८ अंक जोडेको थि्रस्टार एक दिनका लागि भएपनि लिग तालिकाको दोस्रो स्थानमा उक्लिएको छ । थ्रीस्टार भन्दा एक खेल कम खेलेको मनाङ २९ अंकका साथ शीर्ष स्थानमा छ भने पुलिसको २६ तथा मच्छिन्द्रको २५ अंक छ ।

तस्वीर साभार : गोल नेपाल डटकम 

स्रोत : अनलाईनखबर