सूर्यबहादुरका तीन पुस्ता चुनाव लड्दै, लोकेन्द्रका पनि बाबुछोरा भिड्ने

भिडियो हेर्नको माथि को बक्स मा डबल क्लिक गर्नु होस्

२० भदौ, काठमाण्डौं । आगामी संविधानसभाको निर्वाचनमा राष्ट्रिय प्रजातन्त्र पार्टीका अध्यक्ष सूर्यबहादुर थापाका तीन पुस्ताले उम्मेदवारी दिने भएको छ ।

सूर्यबहादुर थापा, उनका छोरा सुनील थापा र नाति सिद्धार्थ थापाले चुनाव लड्ने भएका हुन् । सूर्यबहादुरका दाईका छोरा विराट थापाले पनि उम्मेदवारी दिने भएका छन् ।

सूर्यबहादुर थापाको नाम धनकुटा २ बाट सिफारिस भएको छ भने सुनीलको नाम सर्लाही ४ बाट सिफारिस भएको छ । विराट थापा र सिद्धार्थ थापाले भने मोरङबाट उम्मेदवारी दिने तयारी गरेका छन् । केही दिनअघि भएको राप्रपाको महाधिवेशनमा सुनील थापाले दोस्रो नम्बरमा सबैभन्दा बढी मत ल्याएर केन्द्रीय सदस्यमा चुनाव जितेका थिए ।

यस्तै राप्रपाका बरिष्ठ नेता लोकेन्द्रबहादुर चन्दका बाबुछोराले नै आगामी संविधानसभाको चुनावमा उम्मेदवारी दिने भएको नयाँ पत्रिकामा खबर छ । लोकेन्द्रको नाम बैतडी २ बाट र जयन्तको नाम कञ्चनपुर ४ बाट सिफारिस भएको छ । जयन्तले राप्रपाको महाधिवेशनमा सबैभन्दा बढी मत ल्याएर केन्द्रीय सदस्यमा चुनाव जितेका थिए ।